Shillong, Nailur 12 : Wat siat ia u nongrah khubor (Don’t shoot the messenger) lane wat pynshitom ia uno uno uba shu wan ai khubor, watla kim dei ia ka ban shah kynnoh.
Haba kyrshan ia u Commissioner & Secretary ka Tnad Pule Puthi Vijay Kumar Mantri, ka seng jong ki skul – Meghalaya School Welfare Development Association-Central Body (MSWDA-CB) kala pynrem jur ia ka jingdawa jong ka Voice of the People Party (VPP) halor ka jingdawa ban wengkam ia u, da kaba ong ba ka jingialeh halor ka policy kam lah ban ka jingbeh men aiksuid ia u Ophisar uba trei iala ka kam.
Ha ka shithi sha u Myntri Rangbah Conrad K Sangma ha ka sngi Thohdieng, kane ka seng kaba mih khmat ia ki School Managing Committee jong ki skul ba ioh jingiarap, ioh jingiathuh ha kylleng ka Jylla, kila kren shai ba kim kyrshan satia ia ka jingdawa jong ka VPP.
“ia ka jingsngew iapher halor ka policy ka Sorkar ka dei ia kabna pynbeit lyngba ka jingiakren ba jai jai bad ka jingkynthoh kaba tei, ym ban pynkylla sha ka jingdawa shimet ban weng ia u Ophisar uba pyndep iala ka jong ka kamram” ong ka MSWDA.
Ka Association ka ong ba ka kam pule dangle ka shah ktah ha ka jinglah shiliang kaba la iaid da ki phew snem – ki nonghikai kiba trei ia kajuh ka kam bad kajuh ka kyrdan NCTE kila shah phiah ha ka science grant, fourth teacher, adhoc bad la la ka jong ka tulop.
“Kane ka jingiapher hi kala wanrah ia ki jingud jingnam ba man ka por, ki jingiakhih bad ki jingpyrshah. Kano kano ka jingpyrshang ba dei hok ban pynbeit ia ka dei ban khmih ha ka rukom kaba dei, ym ban pynman kum kawei ka mat jong kawei pat ka kam” kala ong.
Haba pynksan ia ka State Pay Framework (SPF), ka MSWDA ka ong ba kane ka dei ka sienjam ban wanrah ia ka jinglong kajuh bad ka jingpynbeit ryntih.
“Ka jingpyntreikam mynta ia ka SPF na ka bynta kiba dang shu thungkam thymmai ka dei na ka bynta ka por ba lyngba ba long arsnem kum shibynta jong ka jingpyrshang ban pynbeit ia ka kam pule dangle. Ngim mynjur satia ia ka jingpyrshang ban pynlong sohpdeng ia u Mantri namar ka policy jong ka Sorkar” kala ong.
“U Ophisar uba pyntreikam ia ka policy ka Sorkar um dei ban shah tynrong ia ka jingkitkhlieh shimet tang namar ba ka kynhun ne ka seng sain pyrthei kam mynjur ia ka” kala bynrap.
Ka Association kala ong ba u Myntri ula iakynduh man ka por ia ki kynhun ba don bynta ha ka kam bad ula trei ia ki kam ban pynbeit ia ki jingeh kiba la sahteng la slem bha.
“Lada ia man ki kam ban wanrah jingkylla la pynlong kum ka daw ban dawa weng ia u Ophisar, kan dei ka jingkhein poh ia ka rukom pyniaid kam bad ia ka bor jong ka Sorkar ban pyntreikam ia ki jingpynkylla” kala maham.
