Dei ban pynduh noh ia ki skul bym don khynnah bad don tang nonghikai
Shillong, Nailur 11 : U Myntri ka tnad Pule Puthi Bah Lahkmen Rymbui ha ka sngi Thohdieng ula kren shai ba ka jingpynbeit ryntih ha ka jingdon nonghikai ha man ki skul (rationalization) ka dei ka bym lah ban iakren da kumwei pat.
“Ngim lah ban don ia ki skul ba khlem khynnah pule hynrei don pat lai ngut ki nonghikai, bad ki skul ba don 300 ngut ki khynnah ki don tang 2 ngut ki nonghikai. Ka jingpynbeit ryntih ka dei ka lynti shakhmat khlem da ktah ia ki nonghikai bala don lypa. Ngin sa pyndep ia kane hapoh ka por kaba biang” ong u Bah Rymbui.
Ula ong ba ka tnad Pule Puthi kala kyntur ia ki jingpynkylla ha kiba bun ki bynta ban pynkhlain ia ka jingialeh ban pynrung ia ka ktien Khasi bad Garo ha ka Khyrnit ba Phra.
“Ha kane ka shisnem bala leit noh, ngi la mynjur ia ki kot ban hikai ia ka ktien Khasi bad Garo. Ka jingthmu jong ngi ka long kaba shai-Ngi kwah ia kine ki ktien ban rung ha ka Khyrnit ba Phra, kumta ngi hap ban pynkhlain ia ka nongrim” ula ong.
Haba kren halor ka kaiphod 2024-25 jong ka NITI Aayog, u Bah Rymbui ula ong ba tang 8.2% ki graduate ki ioh kam kiba don jingiadei bad ka jingpule jong ki.
“Shaei ki 92% ki leit?. Ngi ithuh ba ka sap ka long kaba kongsan. Ngi la wanrah ia ka Community Integral Skill Learning ban pynrung ia ka sap ha ryngkat bad ki jingpule naduh ka klas V ter ter” ula ong.
Halor ki nonghikai bad ki jingtei, ula ong ba ka Sorkar kala pynkha ia ka Meghalaya Teachers Training Academy bad kyntiew kyrdan ia baroh ki skul Secondary ka Sorkar sha ki Higher Secondary.
Halor ka DBT na ka bynta ki Uniform, u Bah Lahkmen ula kubur ba ki don ki jingbym biang.
“Ngi la leh ia ka DBT ha u snem bala lah, kila don shibun bah ki jingujor. Ngi la iohi ruh ha Iingdorbar Thaw Ain. Ngi la lap ia ki jingshisha bad ngin sa shim ia ki sienjam ban pynbeit. Hynrei ban kynnoh ia uwei u Ophisar kam long satia kaba dei” ula ong.
Haba batai ia ki jingmyntoi ba ioh ha ka tnad Pule Puthi hapoh ka jingialam u Myntri Rangbah Conrad K Sangma, u Bah Rymbui ula ong “Naduh ka sngi ba nyngkong ha u 2018, u CM ula ong ba ka pule puthi ka dei kaba hakhmat eh. Katno ngut ki CM hashuwa jong u? Tang hynriew tylli ki college Sorkar, mynta ngi la ioh iala ka University, engineering committee, architecture bad urban planning college, ki college Sorkar ha kylleng ka Jylla. Ka People’s college kala mih namar ka jingkyrshan u CM. Baroh ki jingpynkiew kyrdan ia ki skul Secondary sha ki Higher Secondary kan ym jia khlem ka jingkyrshan jong u”.
