Shillong, Nailur 11 : U Myntri ka tnad Pule Puthi Bah Lahkmen Rymbui ha ka sngi Thohdieng ula ther kylla ia ka Voice of the People Party (VPP) halor ka jingdawa ban weng ia u Commissioner & Secretary ka Tnad Vijay Kumar Mantri, da kaba ong ba une u dei u Ophisar uba trei shitom bha bad u Ophisar ba lah ban iakynduh mano mano ruh hapoh ka Tnad.
“Nga la iohi ia ki daw bala kdew da kane ka seng sain pyrthei. U Vijay Mantri u dei uba trei shitom bha bad u Ophis ba lah ban iakynduh da mano mano ruh” ong u Bah Rymbui.
U ong ba u Mantri u lah ban nym lah pynbeit ia man ki jingeh hangto hangto hynrei u dei uba sngap. “U shah skhor bha bad u don ia ka bor ban sngewthuh bad ban pynbeit ia ki jingeh” ula ong.
Haba ther kylla ia ka jingkynnoh ka VPP ba u Mantri um ju sngap ia ki nonghikai, u bah Lahkmen ula ong ba kane ka long kaba bakla hi khait.
“Ha ka por ba ki nonghikai ki iashah thngan ha Malki, ula leit dalade haduh arsien kum u nongmihkhmat ka Sorkar ban ong ha ki ba ngi la wanrah ia ka rukom siew tulop ba thymmai. Ka jingdawa ka long ban pynkiew ia ka tulop bad ka jingshngain ha ka rukom im. Hapoh u Myntri Rangbah Conrad K Sangma ngi la trei shitom halor kane. Ula iakynduh ia bun tylli ki Seng, kaba lam sah ka jingsiew tulop ba thymmai” ong u Bah Rymbui.
“Kum u khlieh ka Tnad, ula pyrshang katba lah bad pynsngewthuh ia ka Sorkar ba kan shim ia ki sien jam kiba eh” ula ong.
Haba kyntheria ka VPP, u Bah Rymbui ula ong ‘Lada phi lah ban ithuh ia u Ophisar ba kham treikam bha ba ia u Vijay Kumar Mantri, sngewbha pynithuh ia u. Kam don jingma satia. Ngi don arngut ki Commissioner & Secretary bad kila treikam bha. To ngin ym pynduh mynsiem ia ki Ophisar kiba pyrshang ban trei na ka bynta ki kam kiba bha”.
“Um don uwei ruh uba biang lut, Nga ruh ngam biang lut, hynrei ngi la pyrshang ban pyndep iala ki kam bala shim jingkitkhlieh” ula bynrap.
