Shillong, Nailur 11 : Ka Jaintia National Council (JNC) kala ther tyngeh ia ka Fact-Finding Committee ka Sorkar Jylla halor ki kynrum kynram ba mih na ka public hearing ka Shree Cement ha Lum Syrman bad ong ba dei tang ka buit pynthame ban ialam bakla ia ki trai jaka bad ki nongrep.
U President ka JNC Sambormi Lyngdoh ha ka sngi Thohdieng ula ong ba ka Sorkar kala pynbna ban pynsangeh ia ki kam ka Shree Cement bad ban tohkit ia ki kam thombor ha ka sngi ba long ka Public Hearing, hynrei ki kot ki sla jong kane ka kompani ban ioh ia ka environmental clearance ka dang iaid shaid shaid.
“Ha ka 8 tarik Nailur, ka State Level Expert Appraisal Committee ha ka jingialang ba 103, mat ba 7, kala buh ia ka jingkyrpad ka Shree Cement ban ai ia ka Environment Clearance ha Lum Syrman. Lada ka EC ka dang bteng ban pyniaid ia kam, kaei ka jingmut jong ka Fact-Finding Committee? Ka public hearing dalade ka dei na ka bynta ka EC bad ka CTE” ong u bah Sambormi.
U bah Sambormi ula ong ba kane ka committee ka dang dei tang ka syrngiew.
“Pat don ka jingpynbna halor ka rukom treikam, ki rules, ki dkhot, ki khlieh, lane ka por bala buh ban aiti ia ka kaiphod. Ngim lah ban shaniah ia kane” ula ong.
Ula pyniasyriem ia ka bad ki Committee ki bym shym la poi shano shano ruh.
“Ka High-Level Committee halor ka jingpynkynriah ia ki Harijan na Them Metor kam shym la wanrah eiei. Ka Reservation Policy Committee ruh kala shu kut khlem ka jingmyntoi ia u paidbah. Haba ki paidbah ki iakhih na ka bynta ka hok ka jaidbynriew, ka Sorkar ka thung ia ka Committee ban kdat ia ka jingmut jingpyrkhat sha kiwei pat ki bynta” ula ong.
U Bah Sambormi ula ong ba ki paidbah ka ri-lum Jaintia kim dei ban shah ialam bakla. “Ki kam jong ka Shree Cement ki dang iaid wat hapdeng ka status quo. Ka Fact-Finding Committee kan ym poi shano shano ruh. Ka dei tang ka buit jong ka Sorkar” ula ong.
U Bah Sambormi ula ong ba ka JNC kan iai bteng ban dawa ia ka hok jong ki trai jaka bad ki nongrep.
