Shillong, Nailur 11: Ka nam jongu Myntri Rangbah barim ka Jylla u Dr DD Lapang kum u Kpa jong ka Ri-Bhoi District kan iai bteng ban im bad kynmaw shirta, ong u MLA ka Nongpoh u Bah Mayralborn Syiem ha ka sngi palei.
U Bah Syiem ula kren ia katei ha ka Dr DD Lapang Memorial Lecture kaba nyngkong bad ha ka jingsam ia ki khusnam jong ka Essay Competition kaba la pynlong ha USTM kum ka dak jong ka jingrakhe ia ka lyngkhuh sngi iap kaba 1 snem jong u Dr Lapang.
Ia kane ka prokram la pynlong da ka Dr DD Lapang Foundation bad ka University of Science and Technology Meghalaya (USTM) ha ka Central Auditorium.
“Ka nam jong u Kpa ka Ri-Bhoi District kan iai bteng ban im” ong u Bah Syiem, ryngkat bad ka pynkynmaw ia ka histori bad ia ki kam kiba la leh da u Dr Lapang ha kaban thaw bad ban kyntiew ia ka roi ka par jong ka Ri-Bhoi district.
Ha kane ka Memorial Lecture la wan ban iadonlang ki bahaiing bahasem jong u Dr DD Lapang bad ka USTM, kaba pyni ia ka jingiadei kaba la slem hapdeng kane ka longiing bad kane ka skulbah bad ka jingiadei kane ka skulbah bad ka pule puthi bad ha ki kam pynroi ha ka thain Ri-Bhoi.
Ha kane ka jingialang la wan ban iashimbynta da ki bahaiing bahasem u Dr Lapang kiba kynthup ia Sumarlang Oracle Lyngskor, ki khunsiew kiba kynthup ia ka Kong Bamedari Phylla Blah, Meaidibahun Blah bad Deimebanda Blah bad u khunksiew kurim u Aiborlang Warjri, u Chancellor ka USTM u Mahbubul Hoque, Vice Chancellor Prof G D Sharma, Ri-Bhoi College Principal ka Dr Elizabeth Kharkongkor, ki nonghikai, ki nongmihkhmat paitbah, ki samla pule bad kiwei kiwei.
Ha ka essay competition, ki nongjop kila shah pynkup burom da ka song tyngka ryngkat bad ki sertiphiket.
Ha ka kyrdan Junior, Da-i-bashwa Rympeit jongka Alpha English Higher Secondary School la ioh ia ka kyrdan kaba nyngkong da ka T.30,000, Sankidon Makdoh jongka St Dominic Savio’s Higher Secondary School, Mawkhar ula wan baar bad ioh ia ka T.20,000 bad ka Phibashisha Marbaniang kala wan balai bad ioh ia ka T.10,000. Ia ka Consolation Prize la ioh da u Jibansius Marbañiang, Wanplilang Kharbuli bad Omin Binong.
Ha ka Open Category, Jannata Mahbuba Khanam jongka USTM la ioh ia ka kyrdan kaba Nyngkong bad ka T.50,000, ka Anamika Nandy jongka Solar Print Press kala wan baar bad ioh T.30,000 bad u Iaikyrshan Ryntathiang jongka Balawan College ula wan balai bad ioh ia ka T.20,000. Ia ka Consolation Prize la ioh da ka Marshimti Kharwar jongka Shillong Commerce College, u Kennedy Rynjah jongka Manipal University Jaipur, Anchal Singh jongka Banaras Hindu University bad Shireen Aman jongka NEHU.
La pynkut ia ka prokram da kaba ioh ia ki kyntien ai khublei na ka Kong Meaidibahun Blah, Assistant Professor bad Coordinator, Corporate Communication Cell, NIFT Shillong.
