Shillong, Nailur 11 : Ka drama phetseng ha ka United Democratic Party (UDP) kala shim ia ka jing kylla kaba khraw ha ka sngi Thohdieng hadien ba u MLA ka Mawsynram Bah Olan Sing Suin ula pynbna paidbah ba ki 8 ngut ki MLA ka UDP kila don ha ka jingiakren bad ka BJP bad kin sa jam shakhmat ban pyniasoh lada ka pyntreikam ia ki mat jingdawa jong ki.
“Kano re kano ka lah ban jia lada ki mynjur ia ki jingdawa jong ngi. Kano re kano ka lah ban jia, nga iathuh ha phi” ong u Bah Suin ha ki nongthoh khubor hadien ka jingialang jong ka Central Executive Committee (CEC) ka UDP, kaba aiksai ia kaei kaban jia.
Haba kylli la kane kan dei ka jingialang CEC ba khatduh kum u MLA ka UDP, u bah Suin ula phuh samrkhie bad ong “Ngam lah ban tip namar kano re kano ka lah ban jia”.
Ula pynpaw ia ki mat jjingdawa ba buh hakhmat ki nongialam ka BJP ha Delhi-ka jingkynthup ia ka ktien Khasi ha ka Khyrnit ba Phra, ka jingweng noh ia ka jingkhang tih dewiong, ka jingpynkynriah ia ki harijan na Them Metor, ka FCRA bad ka Meghalaya Residents, Safety and Security Act (MRSSA).
“Kine ki dei ki mat ba hakhmat eh. Ki Sengbhalang ruh kila buh ia kine ki mat, ka Iingdorbar Thaw Ain ruh kala mynjur ia ka Resolution. Lad aka Sorkar Pdeng ba mynjur ia ki jingdawa jong ngi, kan don jingeh aiu” ula ong.
Haba ban ba u dei shibynta jong ka mission ki phra ngut ki MLA, u bah Suin ula pyntip ba u nombor u dei phra ym khyndai.
“Ka dei ka mission jong ki 8 ngut ki dkhot. Lada ka misson ka jop, kano kano ka lah ban jia. Kane ka dei ka sain pyrthei. Ka sain pyrthei ka lah ban kylla tang ha ka shisngi” ula ong.
Halor ka jingkyntait myn nyngkong halor ka jingleit Delhi, u bah Suin ula pynshai “Ha kato ka sngi ki don katto katne na ka kynhun ki iadon ha Delhi. Nga don hala ka jong ka Shnong. Ngi iaphiah ia ki kam. Ynda kila wan phai, ngi la iakren”.
Haba kylli la ka jingleit iasoh BJP ka dei kaba la rai khatduh lada la pyntreikam ia ki mat jingdawa, ula ong “Hooid, kano kano ka lah ban jia, ha kano kano ka sngi”.
Haba kyntait ia ka jingiathong ban ioh shuki Myntri, u bah Suin ula ong “Kam don satia ka jingiakren na ka bynta ka shuki Myntri. Ka NPP ka dei ka party ba don paid eh kaba long haduh 33 ngut ki MLA. Ngi la shu tynruh ia ki jingdawa jong ngi”.
Watla ula iashimbynta ha ka CEC ka UDP, u bah Suin u on gba ula kren shai ia ka nongrim jong u hapoh ka jingialang. “Nga la kren shai hapoh ka jingialang ba ka jingiakren bad ka BJP kala iaid” ula ong.
Haba ai nuksa ia u Bah JJM Nichols Roy, u Bah Suin ula ong “Hashuwa ba un rung sha ka Congress, ki paidbah kila kynthoh pyrshah bha ia u, da kaba ong ba lada u rung congress, ki Khristan kin sa duh jait, yn ym shah ia phi ban bam doh masi. U ong ba ai ha nga ia ka lad ban wanrah ia kaba bha tam na ka bynta jong phi. Ula wanrah ia ka Autonomous District Council. Kumjuh ruh ha ka kam jon gngi, lada ki jingdawa jong ngi ki treikam, kaei ka jingeh ia kata? Ta ka daw ka lah ban jia ha kano kano ka por.
Ka jingkren jong u kala shai kdar ba 8 ngut ki MLA ka UDP kila pynkhreh ban leit iasoh noh shen sha ka BJP.
