Plie u CM ia ki kam pynroi bad buh mawnongrim ia ki project ha WGH
Shillong, Nailur 11 : Ka Sorkar Meghalaya kala tyrwa ia ka project ban pyntrei ia ka surok (corridor) ka ban pyniasoh ia ka Meghalaya bad ki Jylla ka thain Shatei Lam Mihngi, ka ban sdang na West Garo Hills bad kut ha East Jaintia Hills.
Ia kane la pyntip da u Myntri Rangbah ka Jylla Conrad K Sangma haba plie paidbah ia ki katto katne ki kam pynroi bad buh mawnongrim ia ki project kiba kongsan ha Tikrikilla bad Raksamgre, kiba don ha West Garo Hills.
“Ngi la tyrwa ia ka surok kaba heh bha-Dalu sha Baghmara, Baghmara sha Ranikor, Ranikor sha Shella bad Ratacherra shaduh sha khappud ka Bangladesh” ong u Conrad haba bynrap “Ynda la pyndep ia kane, kan sa pyniasoh ia ka Silchar, Manipur, Mizoram bad Tripura bad kan pynkylla ia ka khaii pateng bad ka iaid ka ieng ha ka thain”.
Ula pyntip ruh ba ka jingkieng ba pyniasoh ia ka Dhubri-Phulbari, ka project ba T.3,500 klur bad ka jingkieng ba jrong eh ha ka thain lam mihngi ka Jylla, kan plie lynti ia ka khaii ka pateng na ka bynta ka thain Shatei Lam Mihngi baroh kawei. Kane ka jingkieng kala jan dep artad.
Ki project bala plie paidbah bad ki maw nongrim ba buh ha Tikrikilla bad Raksamgre ki kynthup :
(i)Buh mawnongrim ia ka jingkieng maw (PWD Roads) ha Jangrapara, Raksamgre
(ii)Plie ia ka Tourism Guest House ba thymmai ha Nagargaon, Tikrikilla
(iii)Buh mawnongrim na ka bynta ka Tourism Guest House ba thymmai ha Raksamgre.
Ha kane ka jingialang, u Myntri Rangbah ula plie paidbah ruh ia ka Agro Processing Unit shimet ba dang shu plie thymmai-ka Megha Agro Gold ha Tikrikilla, ka ban tylliat ia u kwai, sohtrun bad sohphan ba pynmih na ka thain.
Haba ai jingkren, u Myntri Rangbah ula ong baka Sorkar kala pynleit jingmut ha ka roi ka par bad ka jingkiew shaphrang jong ki jaka nongkyndong bad ki jaka ba don sha jngai eh jong ka Jylla.
“Ka jingpyniasoh surok ka dei kaba iasoh beit beit bad ka jingroi ka ioh ka kot bad kyntiew ia ka kamai kajih. Ta ka daw ngi la buh hakhmat eh ia ka kam shna surok” ong u Myntri Rangbah.
Haba kdew ia ki jingkylla ha ri-lum Garo, ula ong “Ka surok na Baghmara sha Rongara mynshuwa ka ju shim por kumba 3 kynta. Mynta ka shimpor tang 30-45 minit. Na Rongara sha Ranikor kaba ju shim por mynshuwa 3 kynta, mynta ka shim por tang 1 kynta”.
U pyntip ba ha ki 7-8 snem bala leit, ka Sorkar kala shna ia jan 3,500 km ka surok thymmai ha ka Jylla, kaba long 1.1km ka surok man ka sngi. Ula ong ba ia kum kane ka jingshna surok ym pat ju sakhi ha ki 20 snem bala leit noh.
“Ka roi ka par kam lah ban jia tang ha ka shimiet, hynrei ngi hap ban buh mawnongrim ia ka jingkiew shakhmat. Ngi la tei ia ki jingtei, hynrei ngi hap ruh ban siew ia ka tulop sha ki nonghikai bad ki nongtrei. Ngim don satia ia ka mang tyngka kaba pahuh, hynrei ngi hap ban jied ia ki kam kiba kongsan bad trei naduh ka mynsiem” ula bynrap.
U Myntri Rangbah u ong ba nalor ka surok, ka Sorkar kala trei ruh ia ka kam ban pynbun ia ki jingtei kiba donkam jong ka imlang sahlang. Ula pyntip ba palat T.200 klur la mang ha kine ki 4 snem na ka bynta ki 56 tylli ki Block ha baroh kawei ka Jylla ban tei bad pynbha ia ki skul, ki ophis jong ki block bad ki jaka sumar.
U Myntri Rangbah ula ai ka jingiaroh ia ka GHADC hapoh ka jingialam u CEM Dhormonath Sangma bad ia baroh ki MDC kiba la wanrah ia ki jingpynkylla kiba khraw hapoh ka Council.
