Shillong, Nailur 11 : Watla hynriew ngut na ki MLA kila pep ban wan sha ka jingialang ka Central Executive Committee bad ka jingrakhe ia ka Foundation Day, ka UDP ha ka sngi Thohdieng kala ban jur ba ka Iing jong ka, ka long kaba iaid beit iaid ryntih bad kam don satia kano kano ka jingthmu phet seng.
Ki hynriew ngut ki MLA kiba pep ki dei u MLA ka West Shillong Bah Paul Lyngdoh, MLA ka Sohiong Bah Synshar Roy Kupar Lyngdoh, u MLA ka Mawphlang Bah Matthew Beyondstar Kurbah, MLA ka Ranikor Bah Pius Marwein, MLA ka Khliehriat Bah Kyrmen Shylla bad MLA ka Nongpoh Bah Mayralborn Syiem.
“Ngi don ia ka jingialang CEC ba sngewtynnad bha. Ki nongialam na ri-lum Garo, East bad West Jaintia Hills ruh kila wan” ong u General Secretary ka UDP Bah Titosstarwell Chyne haba iakren bad ki nongthoh khubor.
Haba kam ba 5 ngut ki MLA kila wan sha ka jingialang, u Bah Titos ula ong “Kat haduh mynta, kam pat don eiei kaba kum kata. Ka jingkylli kam mih satia ban don ka jingkynthih lane mih na ka party. Kin dang iai don bad ka party kumba ka long”.
“Mano ba pynmih ia ka tdem ne ka ding? Ngim dei ma ngi ba pynmih ia kane. Ka party jong ngi ka dang iatylli, ki MLA jong ngi ki dang iatylli” ula pynpaw haba bynrap “Kumba kila pynshai hapoh ka CEC, kam don satia kano kano ka jingthmu phet seng ia mynta. Ngim lah pat ban batai lypa ia kaei ka ban jia lashai ka sngi”.
Haba pynksan ia ka jingpep ki MLA, u bah Titos u iathuh “U bah Synshar ula pyntip ba don kiba iap bahaiing bad um lah ban wan. U Bah Pius Marwein um don satia ha Shillong, ula leit donkam shabar. Kiwei ki MLA kila pyntip ba ki don iala ki prokram”.
“Ngi dang iatylli kat haduh mynta ka sngi” ula ong.
Halor ka jingpep sha ka jingrakhe ia ka sngi seng ia ka UDP, ula ong “Ngi la khot ia baroh. Lehse kim lait por. Ngim lah ban pynbor iano iano ruh lada ki don da kiwei pat ki kam”.
Halor ki khubor ba ki MLA ka UDP kila iasah ha Delhi ban iakynduh ia ki nongialam ba hakhlieh ka BJP, u bah Titos ula ong “Ki MLA ki long laitluid ban leit sha Delhi, Kolkata. Kam dei ka jingpeit jong ngi shano ba ki leit. Ki lah ban iakynduh ia ki Myntri ka Sorkar Pdeng ne Myntri Rangbah Duh. Kam dei eh ba shisien ba kila iakynduh ia u Amit Shah ne u Myntri rangbah Duh, kin iasoh noh sha ka BJP. Nga dalade nga iakynduh ia ki Myntri ka Sorkar Pdeng, nga iakynduh ia ki Nongialam BJP, phim lah ban ong ba ngan pyniasoh sha ka BJP”.
Haba khein kai ia ki jingkren ba don ka jingbym hun ia ka jinglong President u Bah Metbah Lyngdoh, u Bah Titos ula ong “Ngi la iakren ia kane ka mat ruh. Kila pynshai ba kim don jingeh eiei ruh em bad ki nongialam jong ka party”.
