Shillong,Nailur 10 : Ka Sorkar kala pyntip sha ka Meghalaya High Court ba don haduh 28 ngut ki nongwei kiba dang set ha ki phatok ha kylleng ka Jylla wat hadien ba kila pyndep ia ka por pynsajia.
Ka Iingkashari kala kular ban sa ithuh noh hapoh ka shitaiew ia ki detention centre lane holding centre ban buh ia kine ki koidi.
Ia kane la pyntip da u AAG K Khan hakhmat ka division bench ka Chief Justice Revati Mohite Dere bad Justice W Diengdoh ha ka por ba shong bishar ia ka mukotduma.
U Khan, halor ka jingbthah ka Commissioner & Secretary ka Tnad Pohiing (Political) Kong Rosetta Mary Kurbah, ula ong ba ka Jylla kan sa file ia ka affidavit ba batai bniah ia ki sienjam ban sa shim hadien bala ithuh ia ki centre.
Haba pyntreikam ia ka hukum ka Iingkashariba 9 tarik Nailur, saw ngut ki Ophisar- ka kong Kurbah, Commissioner and Secretary, Home (Prison) Ryntihlang Rapthap, IG Prison Zenith Sangma bad SP-cum FRO Vivek Syiem, kila leit mih hi dalade ha Iingkashari.
Kila kular ba kin sa shim ia ki sienjam ban pynphai pat ia kine ki koidi ha ryngkat ka jingiatreilang bad ki embassy ba dei khmih ia ka kam.
U AAG ula aiti ia ka thup jong ki nongwei ba set palat por ha ki phatok, ia kiba ka Iingkashari kala buh lang ha ka jingthoh.
Ka Iingkashari ka ong ba ki borkhmih, kynthup ka Meghalaya State Legal Services Authority, ki dei ban iarap ia kine ki koidi ban pyndep ia ki jingdonkam ba kin leit phai pat shala ri, kynthup ka jing aplai ia ka FRA lada kine ki koidi kila shong kha bad ki nong India bad don khun.
Ia kane ka mukotduma la buh ban bishar biang ha ka 17 tarik Nailur.
