Shillong, Nailur 10 : U Symbud Myntri Rangbah ba khmih ia ki kam Pohiing (Police) Bah Prestone Tynsong ha ka sngi Balang ula ong ba ka Sorkar kam lah ban shu sngap jar haba don ki nongpynsniew ia ka suk ka sain, bad iada ia ka jingleh ki Pulit pyrshah ia ki nongialam ka KSU hadien ki jingjia thombor ha ka rally thuk thuk kane ka seng ki samla pule.
Haba jubab ia ki jingkynnoh ba shu kem naphang khlem nongrim, u Bah Prestone ula ong ba ka jingkem la leh pyrshah ia ki kam beain kam pher ia ki kynhun sengbhalang ne ki riew shimet kiba donkti.
“Ngi la kren shai ha phi ba kano kano ka kam beain ka dei ka bym lah ban iaroh da lei lei ruh, kam pher phi dei mano mano. Lada phi pynsniew ia ka suk ka sain, kumno ngi lah ban shu sngap jar? Kam pher phi dei ka KSU lane kano kano ka seng, naka liang ki pulit hi, ngi don jingsngewkhia halor ka suk ka sain” ong u Bah Prestone.
Ula kyntu ia baroh ki kynhun ba kin kiar na kino kino ki kam kiba lah ban thaw ia ki jingkulmar bad pynsniew ia ka suk ka sain.
“Ngi kwah ban kyrpad ia baroh ki kynhun ba kin kiar na ki kam beain lane thaw ia ki jingkulmar. Kane ka dei ka khubor ba nga kwah ban phah” ula bynrap.
Halor ka jingdawa ban pynieng ia ki Facilitation Centre kat kum ka Meghalaya Residents Safety and Security Act (MRSSA), 2016, u Bah Prestone ula ong ba ki kam ki jam kila nang iaid shakhmat.
“Shen, kan sa don ka jingiajurip lang bala pynlong da ki bor district ha Umling. Ha ka jingshisha, ka Sorkar Jylla kala dep ban bynshet ha ki Deputy Commissioner ban leh ia kane ka jingjurip lang” ula ong.
