Shillong, Nailur 10: Ka jingleit jurip da ka Meghalaya High Court ia ka Shillong District Jail ha ka sngi Balang kala shem ba ki don 17 ngut ki briew kiba nabar ri kiba dang shah set ha phatok wat haba kila pyndep ia ka jingshah pynsajia, kaba long mar khongpong bad ka jingkam ka sorkar ba kala don tang kawei kum katei ka jingjia.
Ka Division Bench jongka Chief Justice Revati Mohite Dere bad Justice W Diengdoh ha ka sngi Baar kila ioh ia ka jingpyntip na u Additional Advocate General K Khan, halor ki jingbthah lyngba ka shithi ha ka 28 tarik u Nailar 2026, ba tang uwei u briew uba na Bangladesh ula don ha phatok lah palat ia ka 1 snem hadien ba ula pyndep ia ka jingshah pynsajia.
Ha katei ka jingjurip ha ka sngi Balang ban khmih bniah ia ka jinglong jingman jong ka phatok bad ia ki lad jingiarap ha kaba iadei bad ka ain kanun, ka Bench kala shem ba ki don 15 ngut ki nong Bangladesh, uwei na Myanmar bad uwei na Nigerian kiba dang shah set hapoh phatok.
Ka iingbishar kala pynpaw ba u briew uba na Myanmar ula shah set hapoh phatok lah palat ia ka 10 snem hadien ba u lah pyndep ia ka jingshah pynsajia, katba uba na Bangladesh ula shah set la palat ia ka 4 snem palat ia ka por kaba dei ban set phatok ia u.
Kiwei kiwei kila shah set phatok palat ia ka 6 bnai haduh katto katne snem.
Ka iingbishar kala shim ba ki jingtip kiba la ai da u AAG kidei “Kiba la ialam bakla lut bad ki bym dei”.
Ka iingbishar kala bishar ia ka suo motu PIL, WP(C) No. 91/2026.
Ka Amicus Curiae ka T Yangi B kala aiti ruh ba kala lap ia ki 4 ngut kiba shah set phatok ha
Williamnagar, 3 ngut ha Tura bad 4 ngut ha Nongpoh kila pyndep ia ka jingshah pynsajia, watla ym pat lah pynshisha la kidei ki nong India ne kidei kiba nabar ri.
U Inspector General of Prisons, uba la donlang hapoh ka iingbishar ula pyntip ba ka jylla kam don ia ka Detention Centre ban buh ia ki briew kiba nabar ri hadien ba ki lah pyndep ia ka jingshah pynsajia tad haduh ban da phah leit phai noh na ka jaka kaba ki wan.
Haba shim ba ka jingset sah palat ia ka por jongka jingshah pynsajia ka long kaba be-ain̈ bad ka jingpynkhein ia ka Article 21, ka iingbishar kala ong ba ia baroh kitei ki briew kiba nabar ri lah dei pynkynriah noh sha ki Detention Centre kumba la bthah da ka ain̈.
Ka iingbishar kala bthah ia u Commissioner and Secretary, Home (Police), Commissioner and Secretary, Prisons and Correctional Services, IG Prisons bad ki heh ophisar jongka Foreigners Registration Office (FRO), Shillong ba kidei ban wan mih dalade ha ka 10 tarik u Nailur.
Kala pan ruh ia ka jingai jingbatai kumno ban buh ia ka jaka kaban long ka Detention Centre bad ong, ba kan pdiang ia ka jingsiew ia ka bai lutksan na ka bynta kito kiba la shah set ha phatok palat ia ka por ba kidei ban shah pynsajia.
Kala kdew shuh shuh ba kan sa pynmih ia ka hukum kaba biang ha ka sngi palei halor ka jingaiti ia ki jingtip kiba thok ba shukor ia ka iingbishar.
