Shillong, Nailur 09 : U Myntri ka tnad Labor Methodius Dkhar ha ka sngi Balang ula ong ba ka jing pynrung kyrteng ia ki nongbylla bar jylla (migrant worker) hapoh ka Meghalaya Identification, Registration, Safety and Security of Migrant Workers (MIRSS) Rules, kam dei ban long ka atiar ka jingpynibor, haba ban jur ba ka long kaba donkam ban pynthikna ia ka jingshngain bad jingiada ia ki.
Haba kren ha ka jingpynlait bad jingbatai ia ka MIRSS Rules, 2026, e-payment gateway ban siew ia ki kuna, bad ka Standard Operating Procedure (SOP), bala pynlong da ka Tnad Labour, ka Employment and Skill Development ha State Guest House, Tara Ghar, u Bah Methodius ula ong ba ka jingiatrei lang ka long kaba donkam ban lah pyntrei bha ia kane ka ain.
“Ka long kaba donkam ban don ka jingiatreilang hapdeng ki Pulit, ki bor district, ki nongaikam, ki contractor, ki trade union, ki sengbhalang bad ki nongbylla bar jylla ban lah pyntrei bha ia kane ka ain kaba thymmai” ong u Bah Methodius.
U ong ba ka tnad Labour kan don ia ka bynta kaba kongsan eh ha kaban pynthikna ba ia ki kyndon jong ka Act bad ki Rules la pynshai ha ka rukom kaba dei bad ban pyntreikam ha baroh kawei ka Jylla, da kaba phaikhmat sha ki saw tylli ki bynta ba kongsan-ka jingpynsngewthuh, ka jingiarap, ka jingjurip bad ka jingpyntreikam ia ka.
U Bah Methodius ula kyntu ia ki Deputy Commissioner bad ki nongtrei ha ki District ba kin ai ka jingia treilang kaba iajan bha bad ki nongtrei ka Tnad Labour ban pynthikna ia ka jingpyntrei thikna ia ka ain.
Halor ka bynta jong ki Pulit, ula ong “kane ka ain bala pynkylla thymmai ka ai ia ka jingiatreilang kaba iajan hapdeng ki bor Pulit bad ki nongtrei ka Labour. Ki jingujor halor ki jingpynibor, jingbyrngem byrsit, jingibein, jingshah shoh lane kino kino ki ka bymman pyrshah ia ki nongbylla bar jylla dei ban register marmar, tohkit bad pynshitom kat kum ki kyndon ka ain”.
Ula ban jur ruh halor ka jingdonkam ka jingiatreilang hapdeng ka jylla Meghalaya bad ki Jylla kaba ki nongbylla bar jylla ki wan, khamtam na ka bynta ban pynithuh, pynshisha, jingiarap haba jia kino kino ki jingjia bad ka bha ka miat.
U Bah Methodius ula ong ba ki nongaikam, ki contractor bad ki karkhana ki dei ban shim ia ka jingbah khlieh na ka bynta ki nongbylla bar jylla bad ban pynthikna ia ka jingshngain jong ngi bad ka jingioh ia ki jingmyntoi kat kum ki kyndon bala buh da ka Sorkar.
“Ki nongbylla bar jylla ki synniang shi katdei eh ia ka ioh ka kot ka Jylla bad la pyndonkam ia ki ha ki kam tei jingtei, ka koit ka khiah, ka rep ka riang bad ka kam shna jingshna. Ka jingregister ha ka rukom kaba dei kan pynsuk ia ka Sorkar ban tip hangno ba ki trei bad iarao ruh ia ki haba don kino kino ki jingjia. Hynrei, ka jingpynrung kyrteng kam dei ban long ka atiar ban pynibor lane ban thaw ia ki jingkhanglad ia ki nongbylla bad ki nongaikam” ula ong.
U Commissioner and Secretary Dr BDR Tiwari ula ong ba ka Amendment Rules 2026 ka dei kaba la wanrah ban nang pynkhlain shuh shuh ia ki bynta bapher bapher jong ka Act, kaba la sdang pyntrei kam ha u 2020 bad pynkylla thymmai ha u 2024.
