Shillong, Nailur 9: Ka North East Students’ Organisation (NESO) kala pynrem jur halor ka jingiap jong u nongtem na Manipur Chongtham Vikram Singh (55 snem ka rta) ha Southeast Delhi bad dawa ban buh da ka por ia ka jingtohkit ka bym shah liang halor katei ka jingjia.
U Singh, uba shong basah ha Kilokari, ula iap hadien ka jingkynnoh ba ula shah thombor ha kawei ka kynhun ki briew habar ka iingsah jongu namar ba u pyrshah ia ka jingpynthud bad ka jingpynwit ka jongki.
Ha ka shithi pynrem jur, ka NESO kala ong ba ka sngew pangnud bad ia ka hok ban ioh ia ka jingsuk hala ka jong ka iing kala lam pynban sha ka jingduh ia ka jingim.
Kane ka kynhun kaba kynthup ia ki 8 tylli ki seng kiba hakhmat jong ki samla pule ka thain shatei lammihngi, kala dawa ba dei bam shimkhia mardor bad ban leh da kaba tyngeh pyrshah ia kito kiba la donkti bad kala dawa ba dei ban pynshitom tyngeh ia ki katkum ki kyndon aiñ.
Ka NESO kala ong, ba kane ka jingjia kadei ban peit ha kata ka rukom kaba iar ha kaba iadei bad ka jingshun bad jingisih jaidbynriew bad ki kam umsnam kiba la mad da ki paitbah ka thain shatei lammihngi hapoh ka ri India.
Kala pynpaw ba ki samla pule, kiba trei ba ktah bad kiba shong ba sah na kane ka thain shabar jong ka jylla, kila mad ia ki jingshah kynthoh, jingshah byrngem byrsit, jingshah ktahkti bad ka jingbym kynthup lang ia ki ha ka imlang sahlang namar ka dur ka dar ka jongki bad ia ka jaka kaba ki wan.
“Ia kitei yn ym lah ban kyntait ba kidei kiba la jia tang ha ki katto katne. Haba ki nongshong shnong ka thaiñ Shatei lammihngi kim sngewshngain ne ym shim la pdiang sngewbha ia ki hala ka ri lajong, ka pynmih ia ka jingsngewkhia kaba khraw halor ka jingshngain, burom bad ka jingia ryngkat lang” la ong ka NESO.
Kane ka seng kala kyntu ia ki pulit Delhi bad ia ka Sorkar Pdeng ban pynthikna ba ka jingtohkit kan long kaba khuid ba suba bad ban pynkhlain ia ki lad ban iada bad ia ki lad ban pynsngewthuh ia ki paitbah ban iada ia ki briew kiba na ka thain shatei lammihngi ka ri.
Ka NESO kala pynpaw ruh ia ka jingsngewlem sha ki bahaiing bahasem bad sha ki paitbah jong ka Jylla Manipur.
