Nongpoh, Nailur 09 : U President ka National People’s Party (NPP) Meghalaya Unit bad Symbud Myntri Rangbah Bah Prestone Tynsong ula ong, ba lada u kyrtong ka NPP u Dr.DRL Nonglait un jop ia ka elekshon shiteng samoi jong ka MP Lok Sabha kan long ka jingkyrkhu kaba khraw ia ka jaidbynriew bad ia ka jylla.
U Bah Prestone ula kren ia katei ha ka jingialang ialap elekshon ha madan Umden, kaba hap ha Nongpoh Constituency, kaba la wan ban iashimbynta da ki hajar ngut ki paitbah.
“Kane ka elekshon kadei kaba donkam haduh katta katta, lada i Dr Nonglait in jop ia kane ka elekshon, kan long ka jingkyrkhu kaba khraw ia ka jaidbynriew jong ngi baroh kawei, ym tang ia ki Resolution kaba in buddien hynrei ki Skhim bad ki Projek bapher bapher, ngi donkam ban buddien hangtei ha Delhi” ong u Bah Prestone.
“Dei na kane ka daw ba man la ki Sorkar Jylla kiba synshar ha la ki jong ki jong ki Jylla ki kwah ban ioh ia u MP uba don ia ka jingiatrei ha syndah syndah bad ka Sorkar, khnang ba lada u leit shatei kam dei ba un shu leit shongkai hynrei un rah ia ki mat bad ia ki jingdonkam jong ka Jylla bad jong ka Jaidbynriew. Un leit ban tied ia ka jingkhang ym tang jong ka Parliament hynrei ban tied ruh ia ki jingkhang jong ki Tnad ka Sorkar Pdeng ki bapher bapher katkum ka jingdonkam u paitbah ka Jylla Meghalaya ka jong ngi” ong u Bah Prestone.
Ula kyrpad ia ki paitbah ba kin pynjop donburom ia u Dr DRL Nonglait kum u MP uba na ka seng kaba ialam ia ka Sorkar Jylla, khnang ba un buddien ia ki mat ki bapher bapher jong ka Jaidbynriew bad jong ka Jylla.
Haba kren ha kane ka jingïalang, u Prof. Dr. D.R.L. Nonglait ula pynpaw ba kawei na ki daw ba kongsan kaba la pynlong ïa u ban ïakhun ïa kane ka elekshon shiteng samoi na ka seng NPP ka long ban pynurlong ïa ka jingangnud ban pynrung ïa ka ktien Khasi ha ka Khyrnit kaba Phra jong ka Riti Synshar ka Ri India.
Ula ong, ba ha kane ka Jylla, dei tang kane ka Sorkar kaba ialam da ka NPP kaba la mynjur ia ki Government Resolution ban dawa na ka Sorkar Pdeng ban pynrung noh ia ka ktien Khasi bad Garo ha ka Khyrnit kaba Phra jong ka riti synshar ka ri, ban dawa na ka Sorkar Pdeng ban pyntreikam noh ia ka Inner Line Permit (ILP) ha Meghalaya bad kala mynjur ruh ia ka Resolution ban pyrshah ia kano kano ka jingthmu ban tih ia u marpoh khyndew u Uranium uba don ha ka jylla.
Ula ong, dei tang kane ka Sorkar hi kaba la ithuh ruh ia ka ktien Khasi bad Garo kum ki Ktien Sorkar ne Official Language jong ka Jylla bad kane ka Sorkar kala leh ia kiei kiei kiba long katkum ka jingkwah bad jingangnud jong ki paitbah ka jylla namar ba ka dei ka sorkar jong u paitbah.
Ka seng NPP kala pdiang burom ruh ia ki nongialam jong ki seng sain pyrthei ki bapher bapher kiba la wan ban rung noh sha ka NPP da ka jingthmu ban pynkhlain ia ka seng bad khamtam ha kaban ai jingkyrshan pura ia u Dr Nonglait ha ka elekshon MP Lok Sabha.
Ha kane ka jingïalang paidbah, la iadonlang u Myntri Sorkar Jylla u Bah Sosthenes Sohtun, ka Kong Rona Khymdeit ka MDC ka Nongpoh, ki nongïalam ka NPP bad ki hajar ngut ki nongkyrshan jong ka seng.
Ki nongïalam ka seng kila kyntu bad kyrpad ïa ki paidbah ba kin ai ïa ka jingkyrshan kaba pura ïa u Prof. Dr. D.R.L. Nonglait, khnang ba un lah ban ïoh ïa ka jingjop kaba donburom ha kane ka election shiteng samoi.
