Shillong, Nailur 09 : Ban set phatok palat ia ka por bala buh ban pynsajia ka long kaba beain, ong ka Meghalaya High Court ha ka sngi Ba-ar haba khot hajir ia u Inspector General of Prison namar ka jing set ia u nong Bangladesh la palat shisnem hadien ba kut ka por pynsajia ba hynriew bnai.
Ka division bench ka Chief Justice Revati Mohite Dere bad Justice W Diengdoh kala pynmih ia kane ka hukum haba shong bishar ia ka WP(C) No. 91 of 2026 bala ujor da u Registrar General, High Court of Meghalaya.
Haba bishar, u AAG K Khan ula pyntip ia ka Iingkashari ba uwei u nong Bangladesh ula pyndep ia ka jingpynsajia ba hynriew bnai hynrei u dang shah set ha phatok la palat shisnem namar ka jingpynshisha ia ka jinglong trai Ri ka dang sahteng bad u Assistant High Commissioner ka Bangladesh.
Haba kyntait ia kane ka jingpynshai, ka Iingkashari kala ong ba ia u koidi lah dep ban pynkynriah sha ka detention centre lane pynphai pat hadien ba ula pyndep ia ka por pynsajia.
Haba pynpaw ba ki borkhmih kila dei ban shim ia ki sienjam ban iapynbeit bad u Assistant High Commissioner ha ka por ba sdang ka case, ka Iingkashari ka ong ba ka jingbym ai jubab na u Commissioner kam lah ban long ka nongrim ban set ia u briew ha phatok palat ia ka por.
Ka Iingkashari kala maham ruh ba ka lah ban phah siew bailutksan lada une u nong Bangladesh u dang shah set sah ha phatok.
La bthah ia u IG Prison ban wan mih dalade ha Iingkashari ha ka 9 tarik Nailur ban pyntip hangno yn buh ia une u briew hadien ba la pynlait ia u.
