Ka khubor ba sngewtynnad ia ki nongialehkai Muay Thai ka Jylla
Shillong, Nailur 09 : U Myntri Rangbah ka Jylla Conrad K Sangma ula pdiang ia ka jingtyrwa ban shimti ia ka kam kum u Chairman ka United Muay Thai Association of India (UMAI)-ka sienjam ka ban pynroi bad kyntiew ia kane ka jingialehkai martial arts ha Jylla bad ka ri baroh kawei.
Ka United Muay Thai Association (UMAI) ka dei ka synjuk ialehkai ka Ri kaba khmih ban kyntiew, pynroi bad pyniaid ia ka jingialehkai Muay Thai hapoh India. Ka UMAI kala jam ia bun u mawmer da ka jingkhur takma ha bun ki lympung ialehkai ka pyrthei naduh ba ithuh ia ka ha u 2019 da ka International Federation of Muay Thai Association (IFMA), kaba la ithuh ruh da ka International Olympic Committee (IOC).
Haba pynpaw ia ka jingsngewnguh ia ka jingpdiang u Myntri Rangbah ka Jylla ia kane ka kam, u Dr ShriRam Choudhary, General Secretary ka UMAI ula ong ba ka jinglong nongialam bad ka jingiohi jngai jong u Conrad K Sangma kan nang kyntiew bun shah ia ka jingkiew bad jingpaw ka Muay Thai, kawei na ki jingialehkai marmet ba kiew sted bha hapoh ka pyrthei.
Ka Muay Thai kala sakhi ia ka jingnang kiew ha ka jingiashimbynta ha kylleng ka Ti bad kala ioh ia ka jingiathuh ha pyrthei.
Had a fruitful meeting with Mr. Shriram Choudhary, Secretary General of the United Muaythai Association of India (UMAI) and members of the Association.
Honoured by the gesture of inducting me as the Chairman of UMAI. We discussed the immense opportunities Muaythai can create for… pic.twitter.com/NDoSaThp8p
— Conrad K Sangma (@SangmaConrad) September 9, 2026
Ka Meghalaya kala pyni ia ka jingdon ki sap ba bun ha kane ka jingialehkai, da ka jinglah ki nongialehkai na Meghalaya ban ioh khubor palat 50 tylli ki takma na ki lympung ialehkai ka Ri bad shabar ri, kaba pyni ia ka jingdon kyrhai ki sap bad ka jingiashimbynta ki samla.
U Myntri Rangbah Conrad K Sangma mynta ka sngi ula pynkup burom ruh ia ki nongialehkai Muay Thai kiba wanrah nam dang shen ia ka Jylla kum shibynta jong ka Sports Edition ka CM Connect : Achievers of the Month.
Ka Muay Thai ka dei ruh kawei na ki jingialehkai bala tyrwa ban pynlong ha ka 39th National Games, kaban pynlong da ka Meghalaya ha u snem 2027.
Kane ka jingialehkai kala ioh ia ka jingithuh na ki synjuk ialehkai ba paw ka pyrthei kum ka International Olympic Committee, Olympic Council of Asia, bad la pynlong ruh ia ka ha ka World Games, 3rd Asian Youth Games bad ha ka Paris Olympics 2024 kum ka jingialehkai ba shu pyni nam.
