Shillong, Nailur 07 : Ka jingshakri ki nurse ha North Eastern Indira Gandhi Regional Institute of Health & Medical Sciences la khmih lynti ba kan shah ktah jur bha da ka jingrai ka NEIGRIHMS Nurses Association ban shim shuti paidbah ha ka 9 tarik Nailur, bad pynbud da ka jingiakhih ba khlem pud naduh ka 17 tarik Nailur.
Ka Association kala pyntip ba ia kane ka sienjam kala wan jia hadien ka jingbym leh eiei ki bor pyniaid ia ki jingdawa bala sahteng la slem bha wat hapdeng ki jingthoh ba bun sien.
Ha ka kyrwoh, ka NNA kala buh ia saw tylli ki mat jingdawa- ka jingthungkam pura ha baroh ki santion post ba lait thylli jong ki Nursing Officer, weng noh ia ka jingtyrwa ban shim ia ki Nursing Officer nabar, pyntreikam ia ka Office Memorandum ka Health Ministry ba 30 tarik Jymmang, 2026 bad pynlong noh kloi ia ki eksam thungkam ba sahteng.
Ka Association ka ong ba kala dep ban pynlong ia ka jingiakhih ba malu mala ban shu pyni dak, kynthup ka jingdeng ia ki badge rong iong naduh ka 17 tarik Nailar bad pynlong ia ka dharna ba man ka sngi naduh ka 18 tarik Nailar haduh 21 tarik Nailar.
Ka rally kaba la buh ban long ha ka 21 tarik Nailar la pynsangeh noh namar ka jingpynjari ia ka kyndon 163 jong ka BNSS.
Ka iathuh ba ia ka jingialang la pynlong ha ka 19 tarik Nailar bad u Myntri ka Tnad ka Koit ka Khiah ka Jylla Bah Wailadmiki Shylla bad Director Prof. Nalin Mehta, hynrei ym shym la ai satia ia kano kano ka jingkular.
Ka NNA kala ai ia ka notice ba 14 sngi ban shim da ka shuthi paidbah bad kan pyniaid shakhmat bad ka jingiakhih kumba la rai.
