Shillong, Nailur 06 : U National Vice President ka NPP bad Symbud Myntri Rangbah Bah Sniawbhalang Dhar ha ka sngi Saitjain, ula pan ia ka jingkyrshan na ka bynta u Dr DRL Nonglait, kyrtong ka NPP ban iakhun ia ka elekshon shiteng samoi ka Shillong Lok Sabha bad ong ba u MP na kajuh ka kynhun kaba don ha ka Sorkar Jylla bad Sorkar Pdeng ka dei kaba donkam palat khnang ban lah buddien ia ki kam pynroi ha Jylla.
U Bah Sniawbha ula pynbna ruh ia ki project shna surok kiba heh na ka bynta ka thain South Wst Khasi Hills.
Haba ialap elekshon ha Maweit kaba hap hapoh ka Mawshynrut Constituency, u bah Sniawbha ula pynbna ba ka Sorkar kala dep ban mang T.270 klur na ka bynta ka surok Balat-Ranikor-Umpung-Weiloi.
“Ka surok na Balat, Ranikor, Umpung haduh Weilei ka dei kaba la sniew bha. Ngi la dep ban mang T. 270 klur ia ka bad yn shna ia ka kumba long ka surok Nongstoin” ula ong haba bynrap ba kane ka jingmang pisa ka pynshisha ba ka Sorkar NPP kam ju ibein pyrshah ia ki constituency kiba mihkhmat da kiwei pat ki sengsain pyrthei.
U Bah Sniawbha ula pyniasnoh ia ka jingtheh ia ki kam pynroi sha ka jingdonkam ban don ia u MP ka NPP ha Parliament. Ula ong ba ka Sorkar Jylla ka long kaba skhem bha da ka jingdon haduh 38 ngut ki MLA tad haduh u 2028 bad da ka Sorkar NDA ha Delhi, ka jingjop u Dr Nonglait kan pynthikna ia ka jingiatreilang kaba jan hapdeng ka Shillong bad Delhi.
“Kane ka Sorkar ka dei kaba la skhem lypa bad kan bten ghaduh u 2028. Ha Delhi, ka don ka Sorkar NDA. Lada phi jied ia u Dr Nonglait, un leit bad pyndep ia ki kam ba sateng jong ka Jylla. Lada dei hi kajuh ka Sorkar, ngi lah ban wanrah kham bun ki kam pynroi” ula ong.
Haba niew ia u Dr Nonglait kum u nongialam uba don kyrdan bad ba shemphang bha, u Bah Sniawbha ula ong “Ka party ka donkam ia u briew kum ma u. Kum u nongialam, ula ai shibun ki jingai jingmut kiba kynsai sha ka Sorkar”.
Ula kyntu ia ki nongthep vote ban kyrshan ia ka shap ka NPP kaba dei ka kot. “Sngewbha wat nym ieh ia ka NPP. Ai ba ngin jop mynta ka kynti khnang ba ki kam na Delhi sha Shillong kin iaid beit iaid ryntih” ula ong.
U Bah Sniawbha ula pyntip ruh ba ka surok Nongstoin-Maweit ka dei kaba la shimkhia bha hadien ba ka NPP kala thaw ia ka Sorkar bad kala mang haduh T.170 klur ha ki arbynta.
“Phi donbok palat ba phi don ia u Bah Gigur. Hadien ba ngi thaw Sorkar, nga la kyntu bha ia ka surok Nongstoin-Maweit. Ngi la ioh nyngkong T.130 klur na ka bynta 22 Km bad hadien sa T.60 klur la dep ban mang bad ka kam kala iaid shakhmat” ula ong.
Haba pynpaw ia ka jingsngewskhem, u Bah Sniawbha u ong ba u Dr Nongleit un tam bun bah ha ri-lum Jaintia, West Khasi Hills bad East Khasi Hills.
