Shillong, Nailur 6: Ha sngi kyrpang jong ki nonghikai ne Teachers’ Day, ka Khasi Jaintia Deficit School Teachers Association (KJDSTA) kala dawa ban pynlait noh ia ka tulop, DA bad CPFba sahteng bad ruh ban pynduh noh ia ka jingpynbna ka Sorkar ban pynduh noh ia ki Sanctioned Posts.
U President ka KJDSTA Bah Boswell Pala ula ong, ba ki nonghikai kim shim la ioh ia ka tulop na ka bynta u Naitung bad Nailar.
“Ngim pat ioh ia ka tulop na ka bynta ar bnai. Ngi kyrpad ia ka sorkar ban shimkhia ia kane” ula ong.
Ula ong, ba ka DA kala shu neh beit 43% mynta lah ar snem bad dei ban pynkiew noh sha ka 49% kham kloi noh hapoh une u snem hynrei kala don ruh ka jingpynsahteng kaba 51% naduh u Naitung 2025 bad 53% naduh u Kyllalyngkot 2026 kadei kaba dang sahteng. Ka CPF kaba 10% ka jingnoh synniang kaba la pynthikna naduh u Kyllalyngkot 2025 ym pat shim la pyntreikam, katba ka DCRG kala neh beit khlem kano kano ka jingai jinghun.
Halor ka jinglait thylli ki kam, u Bah Pala ula ong ba ki Sanctioned Posts kila sahkut thylli mynta lah 2-3 snem. Watla katto katne ki Post kidei kiba lah dep ban pynbna paitbah bad la pynlong ia ka Interview, ka jingai jingmynjur ia ki kyrtong kiba la shah jied kadei kaba dang sahteng, katba ia kiba bun hi ki Post ym shim la ai kano kano ka jingpynbna paitbah.
Ka Association kala pyrshah jur ia ka Tnad Pule Puthi kaba la pynmih ia ka Notification No. ED.9/2026/31 ha ka 12 tarik u Nailar bad ka jingpynshai ne Clarification No. ED.9/2026/34 ha ka 19 tarik u Nailar, kaba tyrwa ban pynduh noh ia ki Deficit bad ia ki Post hikai jong ka Sorkar da kaba wanrah noh ia ki hapoh jong ka SPF/SEMAM kum ka SSA bad Adhoc.
“Kane ka long kaba pynkyndit bha ban iohi ba ka jia hapoh Meghalaya. Balei ban pynduh ia ki Posts kiba lah don lypa wat hashwa ban thaw ia ka Jylla? Ka long ka bym don nongrim bad kaba bakla jur” ong u Bah Pala.
“Ngi pyrshah bad kyntait ia kane ka Notification. Kam dei kaba don nongrim ne kaba ai ia ka hok. Kan pyndkoh ia ka kam pule puthi” ula ong bad ka bynrap ba ka Association kala iakynduh ia u Commissioner & Secretary bad ia u Myntri Sorkar uba khmih ka Pule Puthi ban dawa ba dei ban pynduh noh ia katei.
U Bah Pala ula ong ba ka Notification kan ktah ruh ia ka jingpyniaid shakhmat ia ka jingthungkam ha kaba ki kyrtong kiba la shah jied ki dang ap ban ioh noh ia ka jingmynjur bad kala byrngem ba “Ka Notification kaban pynhiar ia ka kyrdan jong ka jingsiew, kaban pynhiar ia ka burom bad pynjot ia ka lawei jong ki nonghikai ka don ia ka kabu ban pynjot lang ruh ia ka pule puthi ha Meghalaya.”
