Shillong, Risaw 11: U President jong ka Khun Hynniewtrep National Awakening Movement (KHNAM) East Jaintia District, Bah Bhayes Chyrmang, hynne ka sngi ba-ar ula leit ban pyniasoh noh ialade sha ka Bharatiya Janata Party (BJP).
U President ka BJP-Meghalaya Bah Ernest Mawrie ula pdiang burom ia une u Nongialam ka KHNAM sha ka Party bad khot sngewbha ia u ban iasnohkti lang ha kaban trei naka bynta u paidbah.
Haba pyniasoh, u Bah Bhayes ula ong ba ula ioh mynsiem lyngba ki policy jong ka Sorkar BJP ha Delhi hapoh ka jingialam jong u Myntri Rangbah Duh Narendra Modi bad mynta u don ka jingngeit kaba skhem ba ka BJP ka lah ban kyntiew ia ka rukom im jong ki nongshongshnong ka Jylla Meghalaya.
U Bah Bhayes ula kyntu ia ki nongshnong ka Jylla ban bishar ia ka party tang na ki kam ba ka la leh ym na ki khubor hamsaia ki bym shisha bala pynsaphring da kiwei pat ki seng sain pyrthei.
