Shillong, Risaw 11: Ka St Edmund’s College kaba dei ka kolej kaba rim tam hapoh ka jylla Meghalaya, kan rakhe iaka jingdap 100 snem haka 5 tarik Naiwieng mynta u snem.
Ia kane la pynbna da u principal ka St Edmund’s College, u Dr Sylvanus Lamare bad ula iathuh ruh ba ha kane ka jingrakeh dap 100 snem ka kolej kan pynlong shibun ki jingiakop naduh ka ‘Inter College Games’, ki Seminars, ki Book Fair, ki Musical Performance lem bad kiwei kiwei de.
Haba kren sha ki lad pathai khubor u principal ka St Edmund’s College, u Dr. Sylvanus Lamare ula iathuh ba ki don haduh 20 ki tnat pule (UG) departments bad 1 (PG) bad haduh mynta ki don palat 2800 ngut ki samla pule bad 110 ki nonghikai bad 40 ngut ki nongtrei hapoh kane ka kolej.
U Dr. Sylvanus ula ong ba ka St Edmund’s College kadei tang kawei na ki kolej hapoh ka jylla Meghalaya kaba la shah kynthup hapoh ka STAR College Programme daka tnat Biotechnology ka sorkar pdeng.
“Haduh mynta ki don tang 2 tylli ki kolej hapoh ka ri India kata ka St Edmund’s Meghalaya bad ka Lakhimpur College Assam kiba la ithuh daka STAR College Programme ka tnat Biotechnology ka sorkar pdeng” la ong u Dr. Sylvanus.
U Dr. Sylvanus ula ong ba ka St. Edmunds College ka kham paw bha haba iadei bad ka tnat pule BA bad MA in Social Work bad lyngba kine ki tnat pule man ka sngi Thohdieng palat 200 ngut ki samla pule ki ju leit sha ki thain nongkyndon bad pynsngewthuh bad ban kyntiew iaka pule puthi ha ki shnong bapher bapher jong ka jylla.
Haba iadei bad ka jingrakhe dap 100 snem, ki nongpyniaid ka St. Edmunds College ki kyntu iaki samla pule barim (Alumni) ban pynrung kyrteng ialade naka bynta ban ioh jingtip ba kham bniah halor kane ka sngi lada ki kwah ban wan iashim bynta haka jingdap 100 snem.
Naka liang u Vice Principal u Professor Monotosh Chakravarty ula ong ba ha kane ka jingrakhe dap 100 snem baroh ki samla pule ka kolej ba mynta bad ki ba rim naduh ki kmie ki kpa ki lah ban wan iashim bynta ban pyn iphung iphieng iaka jingdap 100 snem ka kolej.
