Pyntip ka Sorkar ba la pynsangeh ia ka jingtreikam ka kompani
Shillong, Nailur 04 : Ka Iingkashari Meghalaya High Court kala pdiang ia ka mukotduma bala mudui da ka Jaintia Students’ Union (JSU) pyrshah ia ka project tih mawshun ka Shree Cement ha East Jaintia Hills, kaba la pynlong ia ka Sorkar Jylla ban pynsangeh lut shuwa ia baroh ki kam ka kompani.
Ka JSU ha ka sngi Thohdieng kala pyntip ba ka Iingkasahri kala pdiang ia ka jingujor ka seng kaba pyni ia ka jingjop kaba khraw na ka bynta ki paidbah kiba shah ktah ha ka thain.
“Ka Iingkashari kala pdiangia ka jingujor jong ngi pyrshah ia ka Sorkar Jylla bad ka Shree Cement” ong ka JSU haba bynrap ba ka Soakr kala aiti ia ka affidavit ba pynthikna ba kala pynsangeh ia baroh ki kam jong ka kompani.
“Ha ka jingjop kaba khraw na ka bynta u paidbah, ka Sorkar Jylla kala aiti ia ka affidavit ba pynthikna ba kala pynsangeh lut ia baroh ki kam jong ka Shree Cement. Ka kompani kam lah shuh ban pyniaid ia kino kino ki kam tih par katba ka jingtohkit ka dang iaid” ong ka JSU ha ka kyrwoh bala pynlait da u Education Secretary Bocheru M Pohsnem.
Ka Jylla kala pyntip ia ka Iingkasahri ba kan thung ia ka Fact-Finding Committee ka ban shong bishar ia baroh ki bynta jong ka project naduh ki kam ba iadei bad ka mariang, ka imlang sahlang, ka ain bad ki kam bymman.
Hynrei, ka JSU kala kyntait ia kane ka sienjam bad dawa ia ka jingtohkit ba peit thuh da ka Iingkashari.
“Ngi dawa jur ia ka jingtohkit ba laitluid pura, ka jingtohkit ba peitthuh ka Iingkasahri ban pynthikna ia ka jingtreikam kaba shai. Ia ka Sorkar ym lah ban shaniah ba kan pynlong ia ka jingtohkit ka bym shah liang” ong ka JSU.
Ka Iingkashari kan sa shong bishar ia kane ka mukotduma ha ka 7 tarik Nailur, 2026, ban ioh shuh shuh ia ka jubab na ka Sorkar, ong ka JSU.
Ka JSU kala ong ruh b aka dang pynkhreh ia ka jubab hakhmat ka Meghalaya Human Rights Commission (MHRC), kaba la bthah ban aiti ia ki jingai jingmut hapoh ka 28 tarik Nailur halor ka kaiphod bala aiti da ki Pulit bad ki bor district haba iadei bad ki jingkynnoh kam thombor bad thom ia ka jingiakhih.
Ka JSU kala kynnoh ba ka kaiphod ka dei ka bym shai bad kaba iaid lait ia kiei kiei baroh bad ki kot ki sla jong ki Pulit hi ki kubur ia ka jingthombor ia ka kynhun medical ba wan ai jingiarap daki briew ba kiengatiar.
