Shillong, Nailur 04 : Wat hadien hynriew bnai jong ka jingjia hapoh ka par dewiong beain ha Mynsngat-Thangsko, kaba shim haduh 34 ngut ki mynsiem briew, ki Pulit kin dang pyndep ia ka jingtohkit namar ka jingsahteng ka kaiphod post mortem jong kiba iap, pynpaw ka Justice BP Katakey Committee.
Ha ka 40th Interim Report bala aiti sha ka Iingkashari Meghalaya High Court, ka Committee kala kdewba kat kum ki jingtip ba ioh na ka tnad Pohiing (Police) halor ka jingtohkit ka SIT ia ka Khliehriat PS Case No. 14/2026, la ong ba ia ka main charge-sheet la file ha ka 18 tarik Rymphang, 2026 bad ia ka charge-sheet bynrap la file ha ka 24 Rymphang bad 6 tarik Jymmang.
Katba 15 tylli ki kaiphod post mortem lah lum na West Jaintia Hills ha ka 21 tarik Jymmang, kawei ka kaiphod na Ri-Bhoi kam pat poi satia.
La pyntip sha ka Committee ba ym pat shym la ioh pdiang satia ia ki kaiphod post mortem jong baroh 34 ngut kiba iap ha ka jingialang ba long ha ka 25 tarik Nailar.
“Ka Tnad Pulit ka donkam ban pynkloi ia ka jinglum ia ki kaiphod post mortem ba dang sah bad ban pyndep noh ia ka jingtohkit” ong ka Committee haba pynpaw ba palat hynriew bnai ka por kala iaid naduh ba jia katei ka jingjia.
Ka kaiphod kala buh thup ruh ia ki kam bala leh da ki Pulit hadien katei ka jingjia-90 tylli ki ejahar ba tih dewiong beain, 22 tylli ki ejahar ba khaii beain, 4 tylli ba tuh ia u dewiong ba ioh kurup bad 2 tylli halor ki tiar pynbthei. Ka kynhun ba pyntreikam ia ki hukum ki kynthup ia 4 kynhun ki mobile patrolling, 4 kynhun ki foot patrolling, 5 ngut ki flying squad bad 4 tylli ki NGT checkpoint ryngkat bad 92 sien ki survey da ki drone lah dep ban leh haduh mynta.
Kat kum ka kaiphod, haduh 18,962.966 MT u dewiong, 57 tylli ki kali, 5.5 kg u gelatin bad 74 detonators lah ioh ban kurup nalor ka jingpynpra ia 10 tylli ki kor machine.
La sospon ruh ia arngut ki Heh Pulit- SI O.Nongtdu, Incharge ka Umpleng Outpost bad u AB SI S.Sympli jong kajuh ka outpost, kila shah sospon ha ka 9 tarik Rymphang.
