Shillong, Nailur 03 : Ka Sawmer SC ka la ieng iakhun tyngeh ban beh nadien bad pynjem khnap ia ka Nangkiew Irat FC da 2-1, ha ka Shillong Premier League 2026, ba la long ha ka sngi Palei ha SSA Stadium, Polo.
Ka Nangkiew Irat ka rung sha madan hadien ka jingjop ia artylli ki jingiakhun, bad ialeh ha ba kan bteng ia ka jingkhur namjop na kane ka jingiakhun ba mynta ka sngi.
Ka Nangkiew kala ioh tam shakhmat ha ka kylla step da ka jingioh ban pynkhih jar lyngba u Ronaldkydon L Nonglait (38’).
Ka Sawmer hadien ba ka shah tam, ka ialeh katba lah ban nym ailad ia ka Nangkiew ba kan ioh kynton ia ki kol, da ka jinglah ban tehlakam bha ia ka rukom ialehkai ka jong ka.
Dei tad haba ka jingiakhun ka la jam palat ia ka shi kynta, ka Sawmer SC ka la sdang ban pyllait lut ki ktang lyer bad tang hapoh san minit, ka la lah syndon ban thep haduh artylli ki kol-ka kol ba nyngkong ban pyniakhaid ia ka jingiakhun la thep da u Khrawkupar Tamu (70’) bad ka kol kaba ar ka la wan lyngba u Andy Mawthoh (75’).
Kane kan dei ka sien ba nyngkong na ki hynriew tylli ki jingiakhun ba ka team kaba la shah tam shakhmat ba kan khie khlieh ban lah pat ban khur ia ka jingjop.
Kumta ka resol na kane ka jingiakhun, kala wanrah ia ka jingkylla ha ka miej iakhein point, ha kaba ka Sawmer lyngba kane ka jingjop ka la khur mynta 6 point bad don ruh ha ka kyrdan ba 6, bad khynniat ia ka ka Nongkseh (kaba dang khur 4 point) sha ka kyrdan ba 7.
Katba na ka liang ka Nangkiew, kane ka nam rem ka pynlong ia ka ba kan duh ia ka kyrdan kaba saw, kaba la bat noh ia ka mynta da ka MLP FT, kampher wat hadien kine ki ar kynhun ki la ioh ban khur mar 7 point, hynrei ka jingiapher hapdeng ki, ka long ha ka jingiathep kol ne ka goal difference.
Kane ka lympung kan jam biang sha ka jingiashong thait ba khyndiat sngi bad ba kan wanphai biang tad haduh ka 9 tarik mynta u bnai, ha kaba ka jingiakhun ha kane ka sngi kan long hapdeng ka Mylliem SC pyrshah ia ka Shillong Lajong Fc, ban long ha ka pior 3:40 baje nohphai sngi.
