Shillong, Nailur 02 : U Myntri Rangbah ka Jylla Conrad K Sangma ha ka sngi Balang ula ong ba ka jingkylla kaba jia ha ka pule dangle ka shong eh ha ki nonghikai, haba ban jur ba ym don satia kino kino ki rukomtreikam (system) kiba lah ban long halor ia ka jinglah jong ki.
Haba kren ha ka jingrakhe lypa ia ka 65th State-Level Teachers’ Day ha Tura, u Conrad ula ong “Ym don satia ki rukom pyniaid ia ka pule dangle kiba lah ban long halor ka jinglah treikam jong ki nonghikai, kam pher katno ngi theh pisa ha ki jingtei, katno tylli ki skhim ba ngi pyntrei”.
Kane ka jingrakhe, bala iashimbynta da ki nonghikai na kylleng ka ri-lum Garo bad ka Jylla, kala sakhi ia ka jingsam ia ka State Teachers’ Award bad District Teachers’ Award 2026, Best Scout Master & Guide Captain Awards lem bad ka jingiarap song pisa hapoh ka Teachers’ Welfare Fund.
U Myntri Rangbah ula ong ba ka jingioh jingithuh ba shisha hi ka long kham palat na ka jingioh khusnam.
“Ka jingioh jingithuh kam dei satia tang jong kito kiba ioh khusnam mynta, hynrei ka dei ruh kumjuh ia ki nonghikai ha ki skul ba hikai marwei ha ki shnong khappud, kiba trei ia kane ka kam khlem ka jingiaroh hynrei tang namar ba ki khynnah ki shaniah ha ki” ula ong.
Haba kyrtiang dien ia ka lynti iaid naduh u 2018, u Conrad ula kynmaw ia ka jingiathuh ba donkam T.3000 klur ban pynthymmai ia baroh ki jingtei jong ki iingskul.
“Nga la peit ia ka screen bad ong ba Ngam don T.3000 klur. Hynrei Nga ong to ngin ia sdang, watla ka long tang ia 10 tylli ki skul. Man ki lynti iaid kiba jrong ka sdang shuwa da ka sienjam kaba nyngkong” ula ong.
Lyngba ka Mission Education, ka Jylla kala lah ban kyntiew kyrdan ia palat 2000 tylli ki skul elementary ka Sorkar bad pynbun ia ka jingdon ki skul higher secondary na ka 427 sha ka 545, ula ong.
Halor ka jingbei tyngka, ula ong ba kaba bun ka bhah jong ka Special Development Fund jong u –T.150-180 klur na ka T.300-400 klur bala pynlut ha kine ki phra snem-ka leit sha ka pule dangle, nalor T.600-700 klur la pynlut lyngba ka Tnad Pule Puthi bad kaCSR fund bala pyniaid pura sha kane ka kam.
U Conrad ula ong ba ka Meghalaya kala thaw record ka ri kiew bun eh tang ha ka shisnem ha ka Performance Grading Index, kaba kiew na ka Akanshi-3 shaka Akanshi-1, da ka jingioh scroe ba kiew n aka 448sha ka 525.5 na ka 1000-ka jingkiew ba 77.7%ha ka shisnem bad 124 point khein lang hakisaw snem.
Kane kala paw na ka jingpass haduh 97.2% ki khynnah ha ka SSLC, 86.6% ha ka HSSLC, ka jingleit pule na ka klas X sha ka XI ba kiew haduh 82.1%, kaba tam ia ka national average bad kaba pynduna bun bah ia ka jingpep jingpule shiteng por ha ka secondary.
