Baghmara, Nailur 01 : Ka Baghmara Bar Association kala kyntait ban kyrshan ia ka jingdawa ban weng noh ia u Amit Kumar kum u Advocate General ka Jylla, bad ong ba ka shem ba kam don nongrim ban kyrshan ia kane ka jingdawa haba bishar ia ka jingujor pyrshah ia u bad ka jubab jong u.
Ha ka jingpynbna ba pynmih ha ka sngi Ba-ar, ka Association kala ong ba kala shong pyrkhat ia ka jingkyrpad jong u Secretary ka Meghalaya High Court Bar Association bad kiwei ki Bar Association ki District, ban kyrshan ia ka jingdawa weng ia u Kumar.
Ka Association ka ong ba hadien ka jingpule bniah ia ka ujor bad ka jubab u Advocate General, ka shem ba ka kajia ka dei kaba mih hapdeng u Advocate General bad u Advocate ha ka jingiakhun mukotduma kaba dang don ha ka jingbishar hapoh ka Iingkashari.
“Hadien ba bishar bha ia ka, la shem ba ka kajia ka dei hapdeng u AG bad u Advocate jong kawei ka mukotduma ba dang don ha ka jingbishar ha High Court” ong ka jingpynbna.
Kala bynrap ba ka Association “kam shym la shem ia kano kano ka nongrim kaba khlain” ban kyrshan ia ka jingdawa weng ia u Advocate General.
Kala pyntip ruh ba ki nongiasaid ain ka Baghmara kin nym iashimbynta satia ha ka jingsangeh trei ne ban pyndep ia ki kam ha Iingkashari.
Ka Baghmara Bar Association kala kyntait ruh ban iasnohkti ia ka jingkhot sangeh leit iasaid mukotduma ha ki iingkashari haba kdew ia ka hukum ka Iingkashari ba pyrshah ia ka jingiakhih ki nongiasaid ain.
Ka Baghmara Bar Association kala bthah ia baroh ki dkhot ba kin bud ia ka ain bad ki kyndon bala buh da ka Supreme Court.
