Shillong, Nailur 01 : U National Vice President ka National People’s Party (NPP) bad Symbud Myntri Rangbah Bah Sniawbhalang Dhar ha ka sngi Ba-ar, ula ong ba ka NPP ka iapher na kiwei pat ki seng sain pyrthei namar ka dei kaba sngap ia ka sur u paidbah bad kam ju kiar na kaban pynkylla ia ki rai na ka bynta ka bha ka miat u paidbah.
Haba kren ha ka jingrakhe sngi seng ba 14 jong ka NPP, kaba hap lang bad ka jingrakhe dap 79 snem jong u nongseng (L) Purno A Snagma, u bah Sniawbha ula ong ba ka NPP ka iapher na kiwei pat ki seng sain pyrthei.
“Ka NPP party jong ngi ka iapher na kiwei ki party. Kam pher haduh katno ki kawang maw ia ngi, kam pher haduh katno ngi shah tynjuh ha u slap bad ka eriong, ngi ieng rasong ban trei la ka kam na ka bynta ki paidbah baieid ka Meghalaya. Kane ka dei ka jingiapher ka party jong ngi, ka jingkyrkhu na u Blei” ong u bah Sniawbha.
Ula ai ka jingiaroh ia ka jinglong nongialam u Myntri Rangbah Conrad K Sangma bad u Symbud Myntri Rangbah Bah Prestone Tynsong, haba ong ba kam ju don ka jingiasngew pher jingmut hapdeng ki nongialam ka party.
“Ngi ju don ka jingiapher jingmut hapoh ka jingialam u Myntri Rangbah Conrad K Sangma bad Bah Prestone Tynsong. Ngi sngewthuh ba kam dei kaba suk ban shim rai, hynrei ka NPP kum ka party ka sngap ia ka sur jong u paidbah” ula ong.
“Katto katne ki ong ba kane ka party ka tiengpyut namar ia kat kiba don ki jingdawa ka ai beit. Hynrrei kane ka dei namar ngi don ia ki nongialam kiba iohi jngai. Ngim ju phet rieh na ki jingshisha, ngim ju don ka jingshynrain ban pynkylla ia ka rai jong ngi lada ka dei na ka bynta ka bha ka miat ki briew jong ngi” ula bynrap.
Haba kren halor ka rai ba dang shen jong ka Sorkar, u Bah Sniawbha ula ong “Ha kine ki lai-lai sngi bala leit noh, ngi la lah ban mynjur ia ka resolution pyrshah ia ka jingtih uranium ha Meghalaya. Lada ngi khmih ha ka Meghalaya Amendment Bill, Official Language Bill, ngi dei ban ai khublei ia u Dr DRL Nonglait, uba dei u riew rangbah uba la ai jingmut ia ka Sorkar”.
U ong ba dei ka NPP kaba la wanrah ia ka resolution ban dawa pyntreikam ia ka Inner Line Permit (ILP) hapoh ka Jylla.
Haba pynpaw ba ka long ka burom kaba khraw ban burom ia u (L) PA Sangma ha ka jingdap sngi kha ba 79, u Bah Sniawbha ula ong “Ha ka rta ba dang samla ula shah jied kum u nongialam ka Jylla, khamtam na ri-lum Garo. Ula bat ia ki kyrdan bapher bapher- kumno ban ialam ia ka thain Garo, kumno ban ialam ia ka Meghalaya, kumno ban ialam ia ka thain Shatei Lam Mihngi. Ula long u Myntri Rangbah ka Jylla, Myntri ka Sorkar Pdeng bad Speaker barim ka Lok Sabha. U nongseng jong ngi ula ieh shadien ia bun ki matti kiba ngim dei ban klet”.
Halor ka kam khappud, u Bah Sniawbha ula ong “Ka dei ka kam kaba ym don mano manor uh ba nud ban ktah, khamtam hashuwa ka elekshon. Katto katne ki nongialam ki ong ba lada ngi ktah ia kane ka kam ngi lah ban rem elekshon. Nga kynmaw ia u Myntri Rangbah bad u Bah Prestone Tynsong kiba ong ba lada ngi rem na ka bynta ka bha ka miat ka Jylla, ai ba ngin rem. Ngim shym la artatien bad ngi la leh ia ka. Ngim shym ong ba ngi la lah ban pynbeit ia baroh ki jaka ba don jingiakajia, hynrei ngi la pyrshang kat kaba lah. Ngi la pyndep ia ka bynta ba nyngkong ban pynbeit haduh 6 tylli ki jaka bad mynta ka bynta kaba ar ka dang iaid”.
U Bah Sniawbha u pyntip ba ka Sorkar kala pynlait ia kumba 35 tylli ki skhim bhalang ka imlang sahlang ha kine ki phra snem bala leit noh bad kynthup ia ka CM-Elevate, PRIME Hub, YESS Meghalaya, Hello Meghalaya bad CM-Assured.
Ula kren ruh ia ka rai jong ka kynhun Myntri ban pynduh noh ia ka personal interview ha ka thung kam Grade C bad D hapoh ka District Selection Committee (DSC) ban pynthikna ia ka jingthungkam kaba shai.
