Shillong, Nailur 01: Ka bor district ka District East Khasi Hills ka la shim daki sienjam ba tyngeh pyrshah ia ki nongpyniaid ia ka jingiakob khwai dohkha kaba dang shen ha Mawryngkneng hadien ba ka la wanrah ia ka jingpynthut ia ka iaid ka ieng ki paidbah bad ka jingpynkhein iaka ain iaid kali.
U Deputy Commissioner ka East Khasi Hills Abhilash Baranwal u la ong ba ki bor district kila phah show cause notice bad la register daka ejahar pyrshah iaki nongpyniaid.
“Ha kaba iadei bad ki jingjia kiba la mih namar ka jingiakob khwai dohkha ha Mawryngkneng, ngi la phah show-cause notice sha ki nongpyniaid bad ha kajuh ka por ngi la bthah ia ki pulit ban register ejahar pyrshah ia ki nongpyniaid namar ka jingpynkhein ia ki kyndon ba la buh ha ka jingai jingbit ban pynlong ia ka iakob khwai dohkha nalor ka jingpynthut iaka iaid ka ieng ki kali bad ki paidbah hapoh ka Motor Vehicles Act,” la ong u Baranwal.
U DC ula ong ba ki bor district kan wanrah noh ia ka rukom kaba kham pyrkhing naka bynta ban ai jingbit ia kum kine ki jingiakop ha ki por ban wan.
“Kaei kaba ngin leh hadien habud, ngi dang pynkhreh ia ki bthah ba nangne shakhmat ki nongpyniaid ia kum kine ki jingiakop kin hap ban ai jingtip noh kham kloi bad kaba bniah. Ngin sa don noh ka jingleit jurip lang da baroh iaka jaka pynlong kum kine ki jingïakob” u la ong.
“Kumba ka long mynta ka jingjurip la leh da ka Block Office, hynrei nangne shakhmat ngin sa pynlong ïa ka jingjurip lang iaka jaka haka jingdonlang ki briew naka tnat Police, Dorbar Shnong bad ki briew naka tnat Fisheries. Ngi dang pynkhreh ruh ia ki lad lynti ba ngin wanrah daki kynja kuna iaki nongpyniaid lada jia ba ki jingiakop ki pynthut iaka iaid ka ieng ki kali ne iaki paidbah” ula ong.
