Shillong, Nailur 01 : U Myntri Rangbah Conrad K Sangma ha ka sngi Ba-ar, ula iashimbynta ha u ka jing ialang duwai ha u Lum Jingtrei ka Cathedral Church ha Tura ha ka jingrakhe sngi kha ba 79 snem jong u Speaker barim ka Lok Sabha bad Myntri Rangbah barim ka Jylla Purno A Sangma.
La synran ia u da ka kurim bad MLA Dr Mehtab Chandee A Sangma, u MLA Sanjay A Sangma bad Ian Botham K Sangma.
Ia ka jingialang duwai la ialam da u Auxiliary Bishop ka Tura, Most Rev Jose Chirackal.
Haba kynmaw burom, u Conrad ula ong ba u (L) PA Sangma um dei satia tang u nongialam hynrei u dei ka skulbah.
“Ki jingmut, ki nongrim bad ki jingiohi jngai jong u ki dang iai btin lynti ia ngi. Ia ka jingim jong u la batai da ka jingsngewrit, ka jingburom niam, ka jingim ba ryntih bad ka jingaiti kaba skhem ban shakri ia ki paidbah, khamtam kiba duk bad kiba shah iehnoh bein” ong u Myntri Rangbah.
U ong ba u (L) Purno u ju ngeit ba ki samla ki dei ki lawei bad ka bor ba khlain eh jong ka thain Shatei Lam Mihngi.
“U don ia ka jingiohi jngai kaba khlain ha kaban pynkupbor ia ki samla lyngba ka pule dangle, ka ioh kam iohkam bad ka jinglong nongialam. U kwah ba ki samla jong ngi kin ngeit skhem halade, kiba lah ban iabeh bad kiwei bad kiba suhthied ha ka kolshor jong ngi, ban ban ialam ym tang ia ka Meghalaya hynrei ia ka ri” ong u Conrad.
Ula bynrap ba ki nongrim jong u (L) Pyrno ban iatylli kawei hapdeng ki jingiapher jaidbynriew, ka jingshakri ba aiti lut, ka jingsngew sarong kum ki riewlum bad ka jingialong kawei hapoh ka Ri kan iai bteng ban ai mynsiem pateng la pateng.
“Ula hikai ia ngi ban pyrkhat ia kaba heh, ban don ka jingthrang na ka bynta ki paidbah jong ngi bad ban trei da ka jingaiti lut” ula ong.
Hadien kane, u Myntri Rangbah lem bad ki riew paidbah kila buh syntiew ha u mot jong u (L) Purno A Sangma uba don ha ka PA Sangma Sports Complex ha Dakopgre, Tura.
