Guwahati, Nailar 27: U Myntri Rangbah ka Assam Himanta Biswa Sarma u la khot bad wer ban kyntiew ïa ki jaka lum jong ka jylla kum ki jaka pdeng jong ka kam jngohkai pyrthei, da kaba jer kyrteng ïa ka Umrangso, Haflong bad Diphu napdeng ki jaka kiba lah ban mih pli kum ki lad ban bujli ïa ka nongbah Shillong.
Haba kren ha ki nongthoh khubor ha New Delhi ha ka sngi Balang, u Sarma u la ong ba ki jaka jngohkai pyrthei jong ka Assam ki don ka lad ban khring ïa ki nong jngohkai pyrthei katba ki dang thaw ïa ki lad kamai kiba thymmai na ka bynta ki briew kiba shaniah ha ka kam jngohkai pyrthei.
“Ka Shillong ka dei ka nongbah jong ngi mynshwa, bad ki briew jong ngi ki ieid bha ban leit jngoh ia ka nongbah Shillong”, la ong u Sarma bad bynrap ba ki jaka jngohkai pyrthei kum ka Diphu, Haflong bad Umrangso mynta kidei ban pynroi bad kyntiew bha ia ki.
U Myntri Rangbah ka Jylla u la pynpaw kyrpang ia ka Umrangso, da kaba ong ba katei ka jaka ka lah ban khring bad ia nujir bha bad ka Shillong kum ka jaka jngohkai pyrthei lada pynkhlain ia ki jingtei bad ki jingpyniasoh.
U la kdew ruh sha ki kad liengsuiñ ba la tyrwa ha Umrangso bad Majuli, da kaba ong ba ïa ki jingïakren halor ki projek la pynlong ha New Delhi.U Sarma u la ong ba u khmih lynti ba baroh ar tylli ki kad liengsuiñ kin sa pyndep ha ka por ba u long myntri rangbah.
Ka jingpynleit jingmut ha ka Assam ha ka kam jngohkai pyrthei ka wan ha ka por ba ka jingïadei hapdeng ka Assam bad ka Meghalaya ka la wan ha ka jingeh hadien ki jingjia ba ïadei bad ki kali ba la register na ka Assam bad ki jingïakhih ha Meghalaya.
U Sarma u la ong ba ki sorkar jylla ki la tuklar ban pynbeit ia kane ka jingeh ban pynsuk ia ka leit ka wan jong ki briew bad ki kali.Hynrei u la ong ba ki jingjia kiba dang shen ki la pynpaw ia ka jingdonkam ia ka Assam ban pynkhlain ia la ki jong ki jaka jngohkai pyrthei.
Ka jingkren jong u Myntri Rangbah ka buh ïa ka jingshai ha ka jingkylli kaba kham jylliew na ka bynta ka Assam: hato ki jaka lum jong ka kiba kham duna ka jingroi lah ban pynkylla sha ki jaka jngohkai pyrthei kiba heh ban ïa kaba sah ha ki jaka jngohkai pyrthei kiba ïadei bad ka aiom ne ki jaka jngohkai pyrthei kiba kyrpang.
Ka Umrangso ha Dima Hasao, Haflong—ka jaka shong lum ba kongsan jong ka jylla—bad ka Diphu ha Karbi Anglong ki long ki jaka jngohkai bad ki lad jngohkai bapher bapher, naduh ki lum bad ki pung um haduh ki khlaw bad ki jingïakynduh ïa ka kolshor trai ri trai muluk.
Ka jingpyniasoh kaba kham bha da ka lynti bad ka surok, ka jaka sah, ki jingdonkam jong ki nongjngohkai pyrthei bad ka jingkyntiew ka lah ban pynthikna la kine ki jaka ki lah ne em ban shim ia ka bhah kaba kham heh jong ka jingwan ki nong jngohkai pyrthei jong ka Northeast.
Na ka bynta ka Assam, ka jingpynbor ka lah ruh ban ban khring ïa ki kam jngohkai pyrthei nalor ki jaka jngohkai kiba la seng kum ka Kaziranga, Majuli bad Guwahati bad ban shna ïa ki jaka kamai thymmai ha ki jaka lum jong ka jylla.
