Shillong, Nailar 28 : Ki trai jaka bad ki nongrep na ka shnong Shnongrim kiban shah ktah ha ka project tih mawshun ka Shree Cement Ltd ha Lum Syrman, Elaka Nongkhlieh, kila ai khublei bad sngewnguh ia ka Khasi Students’ Union (KSU) halor ka jinglah ban pynkohnguh ia ka Sorkar ban pynsangeh ia ki kam kane ka kompani dewbilat bad ban tohkit ruh ia ki jingjia kiba jia ha ka public hearing.
“Ngi pynpaw ïa ka jingsngewnguh bad ai khublei kyrpang ïa ka Khasi Students’ Union (KSU) halor ka jingïeng skhem ban pynsngew ïa ka jingeh jong ngi bad ban dawa ïa ka hok jong ki briew kiba shah ktah ha ka Shree Cement project” kila ong.
Ka Sorkar mynta ka la rai ban thung ïa ka Independent Fact-Finding Committee ban tohkit ïa ka rukom pynlong ïa ka Public Hearing, ka jingïashim bynta ki stakeholders bad ki mat kiba ïadei bad ka mariang.
Ka Sorkar ka la rai ruh ban pynsangeh ïa ki kam jong ka Shree Cement haduh ba ka committee kan pyndep ïa ka jingtohkit.
“Hynrei ngi kwah ban pynpaw shai ba kane kam dei ban long ka jingkut jong ka mat. Ka jingeh kaba kongsan jong ngi ki trai jaka na Lum Syrman ka dang sah — ka jingdawa ban pynbeit shwa ïa ka jinglong trai bad ka hok halor ki jaka jong ngi shuwa ban bteng ïa kino kino ki kam kiba ïadei bad ka project” kila ong.
Kat kum ka jingong jongki, “Naduh ba sdang, ngi ki trai jaka ngi la dawa ba dei ban pynbeit shwa ïa ki jaka bad ki hok jong ki trai jaka khnang ba yn ym mih ki jingïakajia, ki jingïapher jingmut bad ki jingjia kiba sngewsih ha ka lawei. Ka jingbym sngap ïa ka jingud bad ka jingkyrpad jong ki briew kiba shah ktah ka lah ban wanrah ïa ka jingbym shongsuk shongsain ha ka imlang sahlang”.
“Ngi sngewthuh ba ka jingmih ki jingïakhih bad ki jingjia kiba sngewsih ha Shillong bad kiwei ki bynta jong ka Ri Khasi bad Jaintia ki ïadei bad bun tylli ki mat kiba la pynmih da ka KSU. Ka KSU ka la kynthup ruh ïa ka Public Hearing jong Shree Cement ha Lum Syrman ha ki mat jingdawa jong ka, namar ki trai jaka kiba shah ktah na kane ka project ki la shah khanglad ban ia shim bynta” kila bynrap.
Kine ki paid ka Shnongrim kila pynrem ïa ka jingkem bad ka jingpynngat mukotduma ïa ki nongïalam ba hakhmat ka KSU halor ki jingjia kiba mih ha Shillong haka sngi ba iaid rally thuk thuk ka KSU tang namar ba don ki riew shim kabu.
“Ngi dawa ba ka Fact-Finding Committee kan long kaba shisha bad kaba laitluid, bad ba ki trai jaka bad ki nongrep na Lum Syrman kin ïoh ïa ka lad ban pynsngew ïa ka jingshisha bad ki jingeh jong ngi. Ka jingtohkit ka dei ban kynthup ïa kaei kaba la jia ha ka sngi jong ka Public Hearing, kynthup ruh ïa ka jingkhanglad ïa ki trai jaka ban poi sha ka jaka long hearing. Ngi ai khublei ïa ka KSU namar ka jingïeng bad ka sur jong ki paidbah kiba shah ktah” kila pynpaw.
Ki paid ka Shnongrim kila pynkut da kaba ong “Ngi kyrmen ba ka Sorkar kan pyntreikam hok ïa ka rai jong ka bad kan ym shu pynsangeh shipor ïa ka project, hynrei kan shim ïa ka lad ban pynbeit pura ïa ki jingeh jong ki trai jaka bad ki nongrep. Ka jingdawa jong ngi ka long kaba shai: Pynbeit shwa ïa ka hok jong ki trai jaka. Pynbeit ïa ki jingeh shuwa ban bteng ïa ka project. Bad burom ïa ka hok jong ki ngi ki Trai jaka”.
