Shillong, Nailar : Ka Mawlai Sports Club ka la bteng ban jam shaphrang ha ka Shillong Premier League 2026 da ka jinglah ka kynhun ba la ialam da u bah Hering Shangpliang kum u coach, ban pynliem ia ka Mylliem SC da 2-1 ha ka jingiakhun hynne ka sngi Balang.
Haba phai sha kane ka jingiakhun, ka Mylliem SC kala ioh ban pynkhih nyngkong ia ka jar lyngba u Istarbor Marngar ha ka minit kaba 33.
Hadien kane, tang kato katne minit shwa ba ka jingiakhun kan khreh ban jam sha ka jingiashong thait ba shipor, ka Mawlai SC ka la ioh ia ka kabu ksiar ban pynphai ia kane ka shi kol lyngba u Basuklang Bina ha ka minit kaba 41.
Haba wan ban bteng ia ka kylla miet, ka jingwan ther u slap, ka madan ialehkai ka la sdang ba kan lang ka um, kaba la pynsyrtok bha ia ki rang ialehkai jong baroh ar kynhun namar ki la shem jingeh bha ban ialehkai, kaba ha kiba bun hi ki bynta jong kane ka madan, ka um slap kam shim la ksam shapoh, kaba hangne ba ha kiba bun ki khep, ki player ki la pyrshang ban shu ialehkai noh nalor ia ka bol.
Wat ha kane ka jingeh, ka jingiakhun pat ka long kaba iakhaid bha, kaba na ka por sha ka por, ka Mawlai bad Mylliem, ki la pyrshang katba lah ban ioh pynkhih biang ia ka jar.
Ha ki khyndiat minit jong ka kylla miet, ka Mawlai shipor, ka la ialehkai kham bha bad nion bor bha ia ka kut ialehkai jong ka Mylliem bad dei ha ka minit ba la pynjlan ia ka por ialehkai, ka Mawlai ka la ioh ban thep ia ka kol kaba ar lyngba u Lovingstar Suting (90+4).
Lashai ka sngi, ka jingiakhun kan long hapdeng ka Shillong Lajong FC pyrshah ia ka Nongkseh SSCC ha ka por 5:30 janmiet.
Ban shu kyrtiang dien ha ka samoi ialehkai u snem ba la dep, kine ki ar kynhun ki la ioh ia ka kabu ban ia aireng hapdeng para maki jan haduh arsien ha ka lympung ka SSA Champions Cup bad ba la bynrap lang ruh sa ha ka jingiakhun 5th Meghalaya State League ka MFA ba long mynta ka snem, bad dang shen kine ki ar kynhun ki dang shu dep ba kin iakhun pyrshah ha ka lympung ialehkai ka Durand Cup.
