Shillong, Risaw 10: U Myntri Koit ka Khiah u James PK, Sangma u la pynpaw ba ka jingshah kawang Bomb tear gas ne lyer pynsat khmat ia ki nonghikai kontrak ka long kaei kaei kaba ym lah ban pdiang satia khamtam haba ka jingiakhih ka long kaba jai jai bha.
“Ki bor pulit kim lah ban pyndonkam da ka bor lane kawang bomb pynsat khmat ia ki paidbah lane iaki nonghikai kiba don da ka jingthmu ba jai jai lada ki pynlong ia ki jingiakhih. Ka jingshah kawang bomb pynsat khmat ki nonghikai ka long kaei kaei kaba ym lah ban pdiang bad ka jingjia ha ka 6 tarik ka long kaba sngewsih bad kam dei shuh ban jia kumne nangne shakhmat” ong u James Sangma haba iakren bad ki nongthoh khubor.
U la ong, katkum ka riti synshar paidbah, ki paidbah lane ki nonghikai ki don iaka hok ban iakhih hynrei ki pulit ne ki bor pyniaid distrik kidei ban long kiba adkar haba ki pyrshang ban tem iaka jingiakynad ban pynthikna ba kim dei ban pynmynsaw ia kiba pynlong iaka jingiakhih.
Kumban shu pynkynmaw, ha ka 6 tarik u Risaw, ki nonghikai kontrak hapoh ka lama jongka Meghalaya Government Lower Primary School Contractual Teachers Association (MGLPSCTA) katba ki dang leit tur sha Secretariat ban dawa na ka sorkar ban thungkam biang ia ki, hynrei ha kane ka jingleit tur ki pulit kila kawang da ki Bomb Tear Gas ia ki nonghikai haba ki pulit kim shym la lah ban khang lynti ia kine ki nongiakhih.
