Shillong Risaw 10: Ha ka sngi rakhe iaka World Mental Health Day, ka sorkar jylla hynne ka sngi kala pynbna ba kala pynwandur (Draft) ‘State Mental Health and Social Care Policy’ da ka jingthmu ban kyntiew iaka bor pyrkhat pyrdain kaba koit ba khlain jong ki Nongshongshnong bad ban pynbiang ruh ia ki jaka ai jingsumar ia ki briew kiba don ia ki jingpang ha ka khlieh.
U Myntri ka koit ka khiah u James PK Sangma ula ong, ia katei ka polisi la pynwandur da ki riewshemphang bad bun kiba don bynta ha katei ka kam kila pyndep iaka jingwad bniah bad ia kane ka draft policy yn buh 15 sngi haka website jong ka sorkar jylla khnang ba ki paidbah kin ioh jingtip shaphang katei ka polisi bad kin ioh ruh ban ai jingmut hashwa ba yn ioh ban pyn treikam pura noh ia ka Policy ha ka jylla Meghalaya.
U James P.K Sangma, u la ong, ka jylla Meghalaya kadei ka jylla kaba nyngkong eh haka thaiñ Lam Mihngi ban pynwandur ia ka Mental Health Policy bad ka jylla kala jam shaphrang haka liang jong ka koit ka khiah ka bor pyrkhat pyrdain da ka jingpynbna paidbah ia katei ka draft policy.
“Ka mat jong ka jingpang kaba ktah iaka jingmut jingpyrkhat kadei kaba la kyntait da kiba bun bad kala don ruh ka jingniew beiñ ne ka jingbym pdiang haka imlang sahlang bad ha kine ki 3 snem kiba la leit, namar ka jingsaphriang ka khlam COVID-19, ka jingpang kaba ktah iaka jing mut jingpyrkhat ruh kala treikam jar jar kum ka khlam. Kane kala pynlong iaka jingdonkam kyrkieh ban don iaka polisi treikam kaba kyrpang ban shimkhia ia ki mat kiba iadei bad ka jingpang kaba ktah iaka jingmut jingpyrkhat” ong u James Sangma.
Une u Myntri ula pynpaw ia ki katto katne ki mat kiba iadei bad katei ka Draft Policy bad ula kyntu ia baroh ba kin ai iaki jingai jingmut ha kaba iadei bad katei ka polisi khnang ba kan long kaba janai.
“Ngi la iatreilang bad kiba bun kiba iadon bynta lang ha katei ka bynta lyngba ka State Capability Enhancement Framework bad ngi la kynthuplang ia baroh ki tnad bad ki kynhun kum shi bynta jong ka jingiatreilang ban lap bad ban weng ia ki jingeh”ong u Myntri ka Koit ka Khiah.
Na ka liang u Principal Secretary ka tnad ka koit ka khiah u Sampath Kumar, u la ong, ka jingthmu jong katei ka polisi kadei ban ai ka jingsumar ia kiba don jingpang haka jingmut jingpyrkhat bad kumjuh ban sngewthuh khambha ia katei ka jingpang ha baroh ki liang.
U la katei ka jingrakhe iaka World Mental Health ka dei shi bynta ban pynsngewthuh ia ki paidbah shaphang ka jingpang haka pyrkhat pyrdain bad ban weng ia ki jingsngewthuh bakla ha kaba iadei bad katei ka jingpang.
