Shillong, Risaw 10 : U Nongialam ka NPP bad Myntri Sorkar James K Sangma hynne ka sngi nyngkong ula ong ba ka All India Trinamool Congress (AITC) kaba don ha Liang Pyrshah, kam don hok satia ban kam ba ka ieng ia ka sur jong u paidbah tang da kaba shu tuh ia ki katto katne ki MLA hapoh ka Jylla.
“Khlem da iakhun wat tang kawei ka elekshon bad da kaba shu tuh ia ki katto katne ngut ki MLA ban wanrah ha ka sem jong ki, ngam tharai ba kane ka ai ia ka hok sha ki (AITC) ban ong ba ka dei ka sur jong u paidbah bad baka ieng ia ka sur u paidbah. Ka dei ka elekshon kaba ai ia ka jingshaniah jong u paidbah” ong u James haba iakren bad ki nongthoh khubor.
U James ula kynthoh ia kane halor ka jingkynthah ba man la ka sngi jong ka AITC pyrshah ia ka Sorkar Meghalaya Democratic Alliance (MDA) ba ialam da ka NPP lem bad ia ka rukom treikam jong ka sorkar.
Ka AITC kala shu kylla long ka Liang Pyrshah ha Jylla hadien ba 12 ngut ki MLA ka Congress kila leit ban pyniasoh bad ka party ha u bnai Nohprah jong u snem bala lah.
Halor ki jingkynnoh bamsap bapher bapher, u James ula ong ba ki briew kiba im ha ka Iing Iit kim dei satia ban kawang maw sha ki Iing jong kiwei pat ki briew. Ula pynkynmaw ruh ba ki briew kiba don ha ka Liang Pyrshah ki dei ruh kiba la don ha ki Sorkar jong ki snem bala lah.
“Kila don shibun ki jingkynnoh bala kynnoh pyrshah ia ki bad ki ruh ki hap ban ai jubab ia kine ki jingkynnoh hynrei ban shu kawang maw bad ban shu kdew kti sha kiwei kata ruh khlem ki sakhi ba lah ban pynshisha, nga sngew ba ka dei kaba bakla shibun” ula ong.
U James ula ong ba ka jingkob iatai nia ba dang shen jong u Nongaiktien ka AITC Saket Gokhale kam dei satia kaba donkam. Ula bynrap ba u Myntri Rangbah ka Jylla ula dep kren shai ba lada baroh ki Myntri ha ka Sorkar ki sdang ban mih sha ki jingiatai nia, mano pat ban wan sha Secretariat ban trei ia ka kam ka jong ki.
“Ngi iaroh ia ka jingsngewkhia u Gokhale…u long uba laitluid ban pynpaw ia ki jingsngew jong u hynrei ban shu kob kat ia u Myntri Rangbah lane Symbud Myntri Rangbah, nga sngew ba kane kam dei kaba donkam namar u Myntri Rangbah bad u Symbud Myntri Rangbah ki dei kiba kloi ban iakynduh ia ki lad pathai khubor bad ki kloi ruh ban jubab ia ki jingkylli na phi baroh. Ki lad pathai khubor ki dei forth estate bad baroh phi dei ka sur jong u paidbah kiba kwah ban kylli jingkylli naka bynta u paidbah ka Jylla bad ki ruh ki ju jubab beit ia ki jingkylli” ula ong.
Halor ka jingpdiang ia ka AITC kum ka party thymmai ba wan rung ha Jylla, une u Nongialam ka NPP ula ong ba ki paidbah ki dei ki nongbishar kiba biang eh bad la kin pdiang ia ka AITC ne em, kane ngin sa peit hadien ka elekshon 2023.
Haba kdew ia ka jingkam ka Congress ba ki briew kila ngiah ia ka Sorkar MDA bad ba kin nym vote shuh ia ki kyrtong ka sorkar MDA ha ka elekshon 2023, u James ula ong “Katba ngi dang iaid shajan jong ka elekshon, kum kine ki jingkynthoh kin mih beit hynrei kam mut pat b aka jingkren jong uwei ne arngut ki briew kan dei ka jingsngew jong baroh ki paidbah”.
