Shillong, Risaw 10 : U Nongialam ka NPP bad Myntri Sorkar James K Sangma hynne ka sngi nyngkong ula bthah ia ka All India Trinamool Congress (AITC) kaba don ha ka Liang Pyrshah ban da leh ‘Homework” bha hashuwa ban kynnoh ia ka NPP ba ka khlem ai jingkhein ia ka jingpynlut jong ka party ha ka elekshon MLA-2018.
“Nga tharai ki hap ban leit bad leh homework shuwa. Kan bha shibun ia ki briew ba bat kat katei ka kyrdan lane ka kyrdan nongialam ba kin da leh homework. Khlem da leh homework bad shu kynthoh kumne ka long ka bym iahap satia” ong u James haba iakren bad ki nongthoh khubor.
U James ula kynthoh ia kane halor ka jingkynnoh jong u National Spokesman ka AITC Saket Gokhale ba ka National People’s Party (NPP) kala pynkhein ia ka hukum ka Iingkashari Supreme Court da kaba khlem lah ban ai jingkhein ia ka jingpynlut ha ka elekshon MLA-2018.
Ha ka jingujor bala aiti dang shen, u Gokhale ula kyntu ia u Chief Electoral Officer (CEO) ban bthah ia ka jingtohkit ba bniah la kala don ne em ka jingpan jingpynshai bala ai pyrshah ia ka NPP bad ban leh eiei ruh mardor.
Haba kylli, u James ula kyntait ia kane ka jingkynnoh bad ong b aka NPP kala bud ia baroh ki kyndon kiba la buh da ka Election Commission ka Ri India (ECI).
“Ngi tip bha iala ka jong ka kamram kum ka Seng bad kaei kaba ngi dei ban leh bad kaei kaba ngim dei ban leh bad ngi da long phikir bha halor ka jingbud ia ki kyndon treikam” ula bynrap.
Ka AITC kala kynnoh ruh ba ka NPP kala shu thok pyllein pyllein halor ka dor jong ki jaka ha ka Audut Annual Financial Report bala aiti sha ka ECI.
U Gokhale ula byrngem ruh ban rah iakren ia kane ka kam sha ka ECI bad ban dawa ia ka jingtohkit ba kyrkieh halor ka jingiapher ha ka jingdon nongkynti jong ka NPP bad kaei kaba kila pynbna sha ka ECI.
