Shillong, Nailar 25: U Myntri ka Kam Jngohkai Timothy D Shira ha ka sngi baar, ula ong ba ka jingiakynad hapdeng ki Tourist Taxi Association ka Assam bad Meghalaya kaba la lam sha ka jingkhang ia ki kali ban iaid hadien ba kala mih ka kam thonbor ha ka 19 tarik u Nailar kadei kaba lah ban pynbeit noh bad kam dei shuh ban don kano kano ka jingkhang ia ka jingiaid ki kali kamai Tourist.
U Myntri ula ong ba ka jingwan ki nongjngohkai kala sangeh lut namar ba kala don ka jingkhang ban iaid ki kali.
“Kim shim la don kino kino ki nongjngohkai kiba la wan bad kumno kin ioh ban wan haba ia ka surok la khang ia ki kali ban iaid” ula ong.
Ula pynpaw ba ka jingshimkhia jong ki Myntri Rangbah la lah ban weng noh ia katei ka kynrum kynram, la ong u Shira.
“Kala don ka jingiakren hapdeng u Myntri Rangbah ka Meghalaya bad Assam bad la lah ban pynbeit noh ia kane, kumta kam dei shuh ban don kano kano ka jingkhang ia ki kali ban iaid ne jingkhang ia ki surok mynta”.
Ula banjur da kaba ong, “Ka Tourist Association na Assam kadei ban shah ia ki kali kali na Meghalaya ban leit sha Assam bad ki briew ka Meghalaya ruh kidei ban shah ia ki kali na Assam ban wan”.
Ha kaba iadei bad ka jingjulor ki kali Tourist na Assam, u Shira ula ong, ba ka Sorkar Jylla kala shim ia ka rai ba kan siew ia ka bai lutksan.
“Ki lah dep ban iakren bad kano kano ka jingjulor kaba la jia ia ki kali na Assam, yn sa siew ia ka bai lutksan da ka Sorkar Meghalaya. Sa kaei pat kaba kin donkam, kumta kam dei shuh ban don kano kano ka mat halor katei” ula ong.
Halor ka jingmad ia ka jingduhnong da kiba pyniaid ia ki Hotel bad Homestay namar ka jingpynsangeh wan ki nongjngohkai, u Myntri ula kren da kaba shai kdar ba kan ym don kano kano ka jingai jingkyrshan da ka pisa. “Kan ym don kano kano ka jingai bai lutksan ia ki Homestay,”ula ong.
Ula Myntri ula kyntu da kaba ong, “Ka jingkyntu ka jong nga, ka long ba ngi dei ban long kiba sngewthuh, kano kano ka jingleh kaba ngi leh hangne ka lah ban don beit ka jingshah pynphai kylla hapoh Assam. Ngi hap long kiba phikir bha bad kiba husiar ban leh ia kiei kiei namar kan don beit ka jingshah pynphai kylla”.
