Dibrugarh, Nailar 25: Ki pulit ka Namsai ki la ioh ban pyllait im ia 19 ngut ki khynnah na ki bynta bapher bapher jong ka Arunachal Pradesh bad ki la kem ruh ia lai ngut ki briew halor ka jingkynnoh ba ki donkti ha ka network khaii khynnah.
Ki briew kiba la shah kem ki dei kiba la tip kyrteng kum u Gumnya Kochung, u Marte Ete bad u Neha Gerory.Ia kine ki khynnah la ioh ban pyllait im na Mechuka, Aalo, Pasighat, Naharlagun, Itanagar bad Longding, ong ki pulit.
Ïa kane ka case la register ha Namsai Police Station ha ka 17 tarik u Nailar hadien ka jingujor jong ka Namsai Child Welfare Committee (CWC).Na ka liang jong ki pulit kila thaw ia ka Special Investigation Team (SIT) hapoh ka jingpeit jong u SP ka Namsai u Sangey Thinley ban tohkit ia kane ka kam.
Ki pulit ki la lap ia ka jingpyniaid pisa kaba 10 hajar haduh 50 hajar tyngka na ka bynta kawei ka khynnah ha ki katto katne ki case.
“Ngi la ioh ban pyllait im ia ki 19 ngut ki khynnah ha kylleng ki jaka bapher bapher jong ka jylla Arunachal Pradesh.La kem ia lai ngut kiba donkti ha ka kam khaii khynnah, ngi dang tohkit ia kane ka kam”, la ong u SP Sangey Thinley.
La iathuh ba katto katne na ki khynnah ba la pyllait im, la pynlong ia ki ban trei kum ki nongiarap ha iing ne ha ki hotel. Ki pulit ki la iathuh ba katto katne na ki ki don hapoh 8 snem ka rta, katba don pat kiba ha kaba sdang kim shym la lah ban ai ia ki jingtip ba kongsan shaphang ka iing ka sem jong ki, kynthup ia ka kyrteng jong ki kmie ki kpa jong ki.
Kane ka case ka la pynpaw ruh ïa ka jingsngewkhia halor ka jingkhaii ïa ki khynnah kiba rit na ki jaka rep slasha jong ka Assam sha Arunachal Pradesh na ka bynta ban ïoh bylla.
“Ki nongkhaii khynnah bunsien ki ju thmu beit ia ki bynta ba rit paid ha ka imlang sahlang.Kiba bun ki khynnah kiba shah khaii ki dei na ki jaka rep slasha jong ka jylla Assam.Bunsien, la rah ia ki sha Arunachal Pradesh na ka bynta ki kam iing kam sem”, la ong uwei u nongialam ka Assam Tea Tribes Students’ Association (ATTSA).
Uwei u nongtrei mon sngewbha uba trei ha ka kam pynlait im bad pynbha ïa ki khynnah u la ong ba kane ka network bunsien ka treikam lyngba ki nongïarap kiba sngewthuh ïa ka jingdawa nongtrei ha Arunachal Pradesh.
“Ka don ka jingduna bor briew ha Arunachal Pradesh bad ki donkam ïa ki briew ban trei ha ki hotel, ki restaurant bad kum ki nongïarap kam ha ïing.Kine ki dalal ki trei katkum ka jingbthah jong ka kynhun khaii briew baroh kawei.Ki don ka jingïadei kaba bha bad ki tip ïa ka jingdawa.Ki thew beit ia ki bynta kiba don jingeh ha ka liang ka ioh ka kot bad ki ialam noh ia ki khun jong ki ban leit trei ha ki jaka bapher bapher jong ka jylla Arunachal Pradesh.Kham bunsien, la ujor ïa ka jingjah briew bad ki khynnah kim ju leit phai sha la ki jong ki ïing ki sem,” ong une u nongtrei mon sngewbha.
Mynta ka SIT ka dang tohkit ia ka bynta jong ki briew kiba la shah kem, ban wad ia ki ba ha iing jong ki khynnah ba la pyllait im bad ban bishar bniah la ki don ne em ki briew kiba donkti ha katei ka network ba la kynnoh.
