Ngim hun ia ka jingiakren bad u Myntri ka Tnad Pule Puthi
Shillong, Risaw 10: Ki nonghikai kontrak hapoh ka shatri ka Meghalaya Lower Primary School Contractual Teachers Association (MGLPSCTA) hynne ka sngi kila ong ba ka jingrai weng iakhih jong ki Nonghikai kontrak ka dei namar ka jingmynsaw jong ki para nonghikai na ka jingshah kawang bomb pynsatkhmat ha ki Pulit ym ba ki hun ia ka jingiakren bad u Myntri ka Tnad Pule Puthi.
Haba kren sha ki lad pathai khubor uwei na ki nonghikai kontrak (bym kwah pynpaw kyrteng) ula ong ba ka jingweng noh iaka jingiakhih kadei namar ki la don ki para nonghikai kiba la mynsaw ha ka jingshah kawang bomb pynsat khmat kaba la jia haka 6 tarik mynta u bnai.
“Ki Nonghikai kim hun satia iaka jingiakren bad u Myntri ka tnat Pule Puthi bah Lahkmen Rymbui hynrei kim banse ban hap weng noh iaka jingiakhih namar ki don ki para nonghikai kiba la mynsaw khamtam ki nonghikai kynthei ba armet” la ong sa uwei na ki nonghikai (bym kwah pynpaw kyrteng).
Ula ong ba ki nonghikai kontrak kin sa shim pat sa da kawei ka rai ban leh iaka ba donkam hadien ba baroh ki nonghikai kila ioh iaka met kaba koit ba khiah.
Uwei na ki nonghikai kontrak ula iathuh ba haka 6 tarik kala don ka jingkulmar namar iwei khun jong ki para nonghikai na West Jaintia Hills ila jah noh bad dei namar kane ka MGLPSCTA kala hap ban weng shwa iaka jingiakhih ban pynbeit iaki jingkynrum kynram baroh.
“Naka liang ka executive committee (EC) jong ka MGLPSCTA kan sa shong jingialang biang ha kiwei ki jaka naka bynta ban shim pat da kiwei ki sienjam haba iadei bad ka jingdawa thungkam biang pura naka sorkar jylla” la ong uwei na ki nonghikai kontrak
