Shillong, Nailar 24 : U Myntri Rangbah ka Jylla Conrad K Sangma ha ka sngi Nyngkong, ula ai ka jingkyrshan ia u Advocate General Amit Kumar halor ka jingdawa weng jong ka High Court of Meghalaya Bar Association.
U Conrad ula pyntip ba um pat shishar ia ka jingdawa jong ka Bar Association hynrei ula ban jur ba ka Sorkar ka donkam palat ban ioh ia u Kumar kum u AG.
“Ngam pat pule bniah ia ka jingdawa bad ki jingpyni nia. Kaei kaba nga kwah ban ong ka long ba ka Meghalaya ka donkam palat ban don ia u briew kum u Amit Kumar ban long kum u Advocate General jong ngi” ong u Myntri Rangbah.
U iathuh ba ki Ophisar bala shongthait bad kiba dang shakri lem bad ki Myntri Sorkar kin kyrshan ia ka synniang jong u Kumar, haba bynrap ba da kaba burom ia ki AG kiba rim bad kito kiba don ha kiwei ki Jylla, ka Sorkar ba mynta ka kmen bha ia ka jingtreikam jong u.
“Ula trei naduh ka mynsiem na ka bynta ki paidbah bad ka Jylla bad btin lynti ia ka Sorkar ha kiba bun ki kam kiba kongsan. Ki kam ki jam ki lah ban iakynduh ia shibun ki jingeh lada um don ma u. Ula iarap ia bun ki tnad ban weng ia ki jingeh ha ka liang ka ain” ong u Conrad.
Haba kyntait ban kynthoh ia ka nongrim jong ka jingdawa ban weng ia u, u CM ula ong ba u Kumar ula jied ban shakri ia ka Meghalaya ban ia ka jinglong nongiasaid ain ha Supreme Court kaba heh kamai.
