Shillong, Nailar 24 : U Myntri Rangbah ka Jylla bad National President ka NPP Conrad K Sangma ha ka sngi Nyngkong, ula pynpaw ba ka jingiehnoh kam jong u MP barim ka Rajya Sabha Dr WR Kharlukhi na ka party ka dei ka rai shimet jong u.
“Ka dei ka rai kaba ula shim dalade bad ngam don eiei ban ong. Nga pdiang ia kaei kaba u rai” ong u Conrad haba iakren bad ki nongthoh khubor.
Haba iathuh ia ka jingiatreilang bad u Dr Kharlukhi naduh ka por jong u Kpa (L) PA Sangma, u Conrad ula ong “Ngi la iatrei lang la slem bha bad ngi la leh shibun kiei kiei kiba pynmyntoi ia ka Jylla bad ia ka party. Ngan kynmaw ia kito ki khyllipmat baroh”.
U pynpaw ba ka NPP ka burom beit iala ki jong ki nongialam.
U Conrad ula pynkynmaw ba u Kpa jong u, u ju kwah ia u Dr Kharlukhi ban long u MP ka Rajya Sabha kham hashuwa hynrei u Dr Kharlukhi ula kyntait ha katei ka por.
“I Pa jong nga I kwah bha ba un long u MP ka Rajya Sabha hynrei ha katei ka por ula kyntait ia kane ka jingtyrwa bad dei na kata ka daw ba u Thomas Sangma ula long u MP ka Rajya Sabha. Nga sngew ba u briew uba la treikam bha ha ka sain pyrthei bad uba la ai shibun ka por sha ka synshar khadar bad ki paidbah u dei ban pynsngew ia ki jingeh ha Parliament. Kumta, ngi la jam shakhmat ban jied ia u kum u MP ka Rajya Sabha” ula ong.
U CM ula ong ba u Dr Kharlukhi lehse u don la ki jong ki jingsngewkhia bad ki jingthmu na ka bynta ka lawei.
Haba pynpaw ia ka jingsngewsih halor kane ka jingiehnohkam, u Conrad ula ong “Ki briew kin wan bad kin leit, ka biang hi. Ha ka jingsngew shimet, Nga da shisha nga sngewsih ba kane ka jia, Ngam poi pyrkhat ba kane kan jia hynrei nga burom ia ka bad nga pdiang ia ka”.
Ula ban jur ba ka party kan iai bteng ban tei iala ka jong ka kam. “Ka party kan jam shakhmat bad iai bteng ban trei. Ngi dang don shibun ki kam ban leh bad bun ki briew kila wan iasoh sha ka party. Kane ka dei kaba ju long ha ka sain pyrthei bad ka sain pyrthei ki seng sain pyrthei” ula bynrap.
