Shillong, Nailar 24 : U Myntri Rangbah Conrad K Sangma ha ka sngi Nyngkong, ula ban jur ban kyntiew ia ki jain tynrai da kaba phong ia ki sopti ryndia sha ki Dorbar Synrai jong ka Iingdorbar Thaw Ain ka Jylla.
Haba pynpaw ba un phong ia ka sopti ryndia ha baroh san sngi jong ka Dorbar Synrai ba mynta, u Conrad ula ong “Kane ka sopti ka dei kaba suh na ka jain ryndia bad nga kyntu ia baroh ban kyntiew iala ki jong ki jain, ki nongthain jain bad ki nongrep”.
Ula tyrwa ruh ban pynlong kongsan ban riam ia ki jain ba suh na ki jain tynrai ka ban long shisngi ha man ki Dorbar jong ka Iingdorbar Thaw Ain.
“Nga la kyntu ia u Lamphang ba ngi dei ban don shisngi kaba ngin pynlong kongsan ia ki dkhot ba kin riam ia ki jain tynrai. Ka lah ban dei kano kano ka jain tynrai, ka lah ban long shisha, hynrei ka dei ban long ka jain tynrai. Kan itynnad bha bad ha kane ka rukom ngin kyntiew iala ka jong ka jingithuh ba kyrpang bad ka kolshor” ong u CM.
