Aizawl, Nailar 24: Ki Pulit ka Jylla Mizoram, ki la kem ïa kawei ka longkmie kaba 38 snem ka rta, halor ka jingkynnoh ba ka la pynïap ïa la u lok hapoh ka ïing ba ki shong wai ha Chawngte C, kaba la tip ruh kum ka Kamalanagar, kaba don ha Lawngtlai district ha ka Sngi u Blei.
Utei u lanot uba la khlad noh u dei uba la tip kyrteng kum u Bipin Kumar Chakma, 45 snem ka rta, katba ia ka kurim jongu, kaba la tip kyrteng kum ka Lokhi Mala, la rah noh tang hadien katei ka jingjia.
Katkum ki pulit, kitei ki arngut kiba dei na ka shnong Sumsilui, ki im kamai jakpoh da kaba die kyiad ha katei ka thain.
“La pyntip ia ngi da ki para marjan hadien ba ki la iohsngew ia ka jingkhihwin na kamra jong kitei ki arngut.Ka kynhun pulit jong ngi ka la poi ha katei ka jaka bad ki la knieh noh ia ki tiar ia ka Lokhi Mala, kaba la lap ba u don tiar.La lap ia u Bipin Kumar ba u la iap ha katei ka jaka”, la ong uwei u heh pulit.
Ki heh ophisar kila ïathuh ba u khun jong kine ki arngut, u Mehery Chakma, u la leit pule shabar ka jylla.
“U Bipin Kumar, u dang shu wan phai dang shen na Silchar ha Assam, ha kaba u la kam ba u la shah lute pisa bad kyiad, la iathuh ba katei ka jingjia, ka la jia tang hadien ba ma u bad u khun jongu, ki la poi ha iing”, la ong utei u heh ophisar.
“Ka jingtohkit ba nyngkong ka pyni ba kane ka jingjia ka lah ban mih na ka jingïakynad kaba ïadei bad ka jingkynnoh ba u Bipin Kumar u la shah lute ha Silchar,” u la bynrap.
Ki pulit ki dang bteng ia ka jingtohkit halor ki jingjia kiba la jia ha katei ka jingiap.
