Shillong, Nailar 24 : U Myntri Rangbah Conrad K Sangma ha ka sngi Nyngkong, ula ong ba ka Sorkar Jylla kala shimkhia bha ia ka jingjia kam thombor ha ka rally thuk thuk ka KSU ba long ha ka 19 tarik Nailar ha Shillong bad kan shim lut ia baroh ki lad ki lynti kiban pynthikna ba ki runar kin ioh ia ka jingpynsajia ba dei hok.
Haba wanrah ia ka suo motu statement ha ka sngi sdang jong ka Dorbar Synrai ka Iingdorbar Thaw Ain ka Jylla, u Conrad ula ong “Ha ka 19 tarik Nailar, ka rally rah lama iong da ka thuk thuk jong ka Khasi Students’ Union la pynlong halor ka jingai jingbit jong u Deputy Commissioner ka East Khasi Hills ha ryngkat ka jingteh kular na ka KSU ba kane ka rally kan long kaba jai jai”.
“Hynrei ha ki kynta jong ka rally, katto katne ki runar kila leh ia ki kam thombor kynthup ka jingkawang maw ia ki 31 tylli ki kali bad thombor ia ki nongiaid nongieng kaba kynthup ruh ia 8 tylli ki kali ba don u nombor Assam. Khatphra ngut ki briew kila mynsaw bad ia kine baroh la ialam ban phah sumar ha Shillong Civil Hospital” ula ong.
U Myntri Rangbah u pyntip ba ha kane kajuh ka miet, ki pulit kila kem ia u President, Vice President bad General Secretary ka KSU hapoh ka kyndon bapher bapher jong ka BNSS bad la pyntreikam ruh iaka Meghalaya Maintenance of Public Order (MMPO) Act.
“Haduh 15 tylli ki ejahar la mudui haduh mynta haba iadei bad kane ka jingjia 19 tarik Nailar. San ngut ki riew tap khmat lah dep ban ithuh kum kiba donkti ha ki kam thombor ha ka 19 tarik Nailar kham tam ha ka jingthombor ia ki kali Assam. Uwei ula dep shah kem mynta” ula ong.
Ula pynbna ruh ba ka Sorkar kala thung ia ka kynhun Special Investigation Team (SIT) ban ithuh bad tohkit ia baroh ki runar kiba donkti ha ki kam thombor ha Shillong khamtam kito kiba thombor ia ki kali Assam bad ban pynthikna ba kin shah pynshitom kat kum ka ain.
“Ia ka SIT la khlieh da u IG Law and Order” ong u Conrad.
Ban pynthikna ia ka jingjai jai hapdeng ka Assam bad Meghalaya, u CM u iathuh ba kala don ka jingialang hapdeng ki Kynhun na ki ar Jylla ha ka 22 tarik Nailar.
“Ia ka kynhun ka Meghalaya la khlieh da u Symbud Myntri Rangbah Bah Sniawbhalang Dhar bad ia ka Assam la khlieh sa u Myntri Sorkar Atul Bora. Ha ka jingialang la iashimbynta ruh da ki Chief Secretary bad ki Heh Ophisar na baroh ar Jylla” ula ong.
Halor kane ka jingialang, ia ka pakhang surok ha Jorabat bala pynlong da ki seng na Assam la lah ban weng noh mynta, kaba lam sha ka jinglong ba jai jai ha ka jingiaid ki kali kit mar ba donkam ha kylleng ka Jylla.
“Ka Assam bad Meghalaya kila buh ia ki hotline ba kyrpang. La thung ruh ia ka District Committee ba shirta ba kyntup ia ki Deputy Commissioner ka Ri-Bhoi bad Kamrup Metropolitan ha ryngkat ki heh Pulit ba bat ia kajuh ka kyrdan na baroh ar jylla ki ban pynthikna ha kaban pynbeit kloi kloi ia kino kino ki jingeh kiba mih ha khappud ki ar jylla” ula bynrap.
“Yn sa thung ruh ia ka Joint Committee ba kynthup ia ki Ophisar ka kyrdan Commissioner & Secretary ka Tnad Transport na baroh ar Jylla ha ryngkat ki nongmihkhmat jong ki Tourist taxi Association, ka ban khmih bad teh kyndon ia ka jingiaid ki kali tourist bad iada ia ka jingmyntoi lang na ki kam jngohaki hapdeng ka Assam bad Meghalaya” ong u Conrad.
U Myntri Rangbah ula pyntip ruh ba u Symbud Myntri Rangbah ka tnad Transport ula lum ia ka jingialang bad ki Association ka Meghalaya ha kaba kine ki Association kila mynjur ban weng noh ia ki jingiakhih kaba la wanrah pat ia ka jinglong jingman kumba ju long ha ka jingiad ki kali bad ka jingalang ban sa long ha ryngkat bad ki association kan sa long biang ha ka taiew ba-ar jong u Nailur ban iakren shuh shuh ia kiwei pat ki mat.
“Nga kwah ban kular ia ki dkhot jong kane ka Iingdorbar bad kumjuh ruh ia ki nongshongshnong ka Jylla jong ngi ba ka jingjia ba sngewsih kaba la jia ka dei kaei kaei kaba ka Sorkar kala shimkhia bha. Ngi la shimkhia ban leh eiei mardor bad ngi kwah ban pynthikna bad kular ia ka Iingdorbar bad ki Nongshongshnong ba ka Sorkar kan shim ia baroh ki sienjam bad ki lad ki lynti baroh ki ban pynthikna ba ki runar kiba donkti bad leh ia ki kam thombor kin ioh ia ka jingpynsajia ba dei hok” ula ban jur.
