Shillong, Nailar 22 : U Symbud Myntri Rangbah ka Jylla Bah Sniawbhalang Dhar ha ka sngi Saitjain ula ong ba ka jinglong jingman ba jai jai kan sa wan phai shen ha Shillong hadien ka jingialang bala pynlong hapdeng ka Sorkar Meghalaya bad Assam ban iabishar kam halor ki kam thombor ba jia ha ka 19 tarik Nailar.
Kane ka jingialang, bala pynlonng hapoh ka jingbthah jong baroh arngut ki Myntri Rangbah, la ialam da u Bah Sniawbhalang Dhar bad Myntri ka Sorkar Assam Atul Bora nalor ki Heh Ophisar na baroh artylli ki Jylla.
“Hadien ka jingialang bala pynlong hapoh ka jingbthah ki Myntri Rangbah na baroh ar Jylla, Nga sngew ba shen ka jinglong jingman ba jai jai kan wan phai pat. Ka jingialang ba mynta ka sngi ka long kaba sngewtynnad bha” ong u bah Sniawbhalang haba iakren bad ki nongthoh khubor.
U Bah Sniawbha ula ong ba ka Sorkar Meghalaya kala pynpaw ia ka jingsngewsih naduh ka mynsiem halor ki jingjia ba 19 tarik Nailar bad kular ba kan leh da kaba tyngeh ia kiba donkti.
Ua ong ba u President, Vice President bad General Secretary ka KSU kila shah kem hapoh ka
Meghalaya Maintenance of Public Order Act, bad haduh 15 tylli ki ejahar la dep ban register haduh mynta.
U bah Sniawbha ula iathuh ba palat 3,007 tylli ki kali ba don u nombor Assam lah synran ia ki ba kin leit phai da ka jingsuk sha Assam haduh mynta. Katba ka Assam Control Roomkala ioh pdiang ia 54 tylli ki phone call ba pan jigiarap ba kynthup ia 75 ngut ki briew, kynthup arngut ki briew ba shong ha ki kali shimet bad san ngut ha ki kali tourist. Ka Meghalaya Control Room kala ioh pdiang 379 tylli ki phone call bad lah ai jingiarap ia baroh kine.
Kiba bun ki kali ba sahkut, kynthup 400-500 tylli kiba leit rieh ha Meghalaya House, kila ioh ban wan rung pat sha Jylla bad ia kiba rah yn sa synran da ki Pulit hapoh ki 48 kynta ban wan, ula ong.
U Bah Sniawbha ula ong ba ki rai ba kongsan bala shim ha ka jingialang ki kynthup ia ka jingthaw ia ki lad treikam lang hapdeng ka IG Special Branch, Assam bad IG Law & Order, Meghalaya ki ban buh ia ki helpline support tang haduh ban da wanphai pat ka jinglong jingman ba jai jai, ka jingthaw ia ki Joint Committee jong ki Deputy Commissioner bad SP ka Nongpoh bad Kamrup Metro ban pynbeit ia ki jingeh ha khappud, bad ka Transport Committee ba kynthup ia ki Ophisar ha ka kyrdan Commissioner & Secretary lem bad ki Seng jong ki kali Tourist ban teh kyndon ia ka jingiaid kamai bad ban iada ia ka jingmyntoi lang na ki kam jngohkai.
U iathuh ba baroh artylli ki Jylla kin pynthikna ia ka jingiaid lynti kaba shngain jong ki kali na Barak Valley sha kiwei ki bynta jong ka Assam lyngba ka Meghalaya bad kiba wan na Assam sha Meghalaya.
U bynrap ba ka Sorkar Meghalaya kan shim ia ka jingkitkhlieh na ka bynta ka jingshngain jong ki nongjngohkai bad ki kali kiba wan rung sha Jylla haba pynbna ruh ia ka song jingiarap ia ki lanot kat kum ka ain hadien bala shong bishar bha da u Chief Secretary.
“Ngi la bynshet ia kane ha u Chief Secretary jong ngi u ban sa shong bishar ia kane ka kam bad un sa ai ia ka song jingiarap kat kum ka ain. Haba iadei bad kito kiba mynsaw, ngin sa ai jingiarap na ka Sorkar” ula ong.
Haba kyrpad ban long jai jai, u Bah Sniawbha ula ong “Ka Assam bad Meghalaya kila ia im kum shipara. Hooid, ki lah ban don ki jingduna hynrei kat kaba long, ka kamram jong ngi kum ka Sorkar ka long ban trei shitom bad ryngkat lang bad ka jingthmu jong kane ka jingialang ka long ban wanrah biang ia ka jinglong jingman ba jai jai. Nga kyrpad ia ki paidbah ka Meghalaya bad Assam ba kin jai jai noh khnang ba ka jinglong jingman ba jai jai kan wanphai ha Shillong”.
U Myntri ka Sorkar Assam Atul Bora ula ong ba ia kane ka jingialang la pynlong kat kum ka jingbthah jong u Myntri Rangbah Himanta Biswa Sarma.
“Kat kum ka jingbthah u Myntri Rangbah, ngi la iashong jingialang bad u Symbud Myntri Rangbah ka Meghalaya lem bad ki Ophisar jong baroh ar jylla, Ngi la ioh ia ka jingialang kaba jrong, lai kynta ka jingiakren bad ngi la iakren ia ki jingsngewkhia jong baroh arngut ki Myntri Rangbah bad ngin sa ia pynmih lang ia ki kyrwoh khubor” ong u Bora.
“Nga kwah ban ai ka jingkhublei naduh ka mynsiem ia baroh arngut ki Myntri Rangbah- Himanta Biswa Sarma na ka bynta ka jingleh tyngeh jong u bad u Conrad K Sangma namar ka jinglong ba kloi ban pynbeit ia kane ka kam” ula bynrap.
