Shillong, Nailar 23: Ki petrol pump ha kylleng ka nongbah Shillong ki la hap ban khang noh ha ka sngi Saitjain hadien ba ki la kam ba kila lut Petrol namar ba ka North-East Petroleum Mazdoor Union (NEPMU) ka la pynsangeh ban pynpoi petrol, diesel bad LPG na Assam sha Meghalaya.
Ka NEPMU ka la ong ba la pynsangeh noh ban pynpoi petrol, diesel bad LPG na Assam sha Meghalaya namar kam don ka jingsngew shngain jong ki kali, kiba na Assam kiba kamai ha Meghalaya hapdeng ka jingkulmar hadien ka jingshah thombor ha ka 19 tarik Nailar bad ba ka la pynpaw ba ka jingpynsangeh kan dang iai bteng haduh ba ka Sorkar Meghalaya kan pynthikna ia ka jingshngain jong ki kali kit mar mata, kynthup ia ki kali ba kit iaki nongjngohkai pyrthei.
Kane ka jingpynsangeh pynpoi petrol, diesel bad LPG na Assam sha Meghalaya kala pynlong iaki paidbah ban ieng lain haki Patrol Pump ha kylleng ka nongbah Shillong ban thied hadien ba ki trok ki dang sahkut ha Khanapara bad kim shym la lah ban rung sha Meghalaya.
Ka Pump kaba don pyrshah ia ka St Edmund’s ka la iathuh ba kam don petrol shuh naduh ka por 11 baje mynstep, katba bun ki Petrol Pump kiba don ha Nongmensong ka la khang naduh mynstep.
Ha Malki, ka Petrol pump ka la khang hadien ka por 4:45 baje janmiet hadien ba ka la die petrol katkum ka jingdon lypa (Reserve).
Kane ka petrol pump naduh 3 baje ka la mang lypa ban die petrol T.200 iaki arshaka bad T.1000 iaki kali namar ba ka dang ap ia ka jingwan jong ki tanker ba kit petrol.
Ka petrol pump kaha don ha Fire Bridge ka la khang noh hadien ka por 3 baje janmiet da kaba kynnoh ba ka petrol ba don ruh kadei naka bynta ban die haka sngi ba bud.
Kiwei ki petrol pump ha Mawlai-Mawiong ki la khang naduh ka por 2 baje janmiet.
Tang katto katne tylli ki Petrol Pump, kynthup ïa ka Samkhamti Petrol Pump kaha don ha Demseiniong, ki la bteng ïa ka jingtreikam, ha kaba la khmih lynti ba ka jingdon petrol ka dang biang naka bynta 2-3 sngi.
