Imphal, Nailar 22: Ka National People’s Party (NPP) Manipur unit ka la kyntu ïa u Myntri Rangbahduh ka ri Narendra Modi ban leh ia ka National Register of Citizens (NRC) shwa ban pynlong ia ka jinglum khana samari bad ka jingphiah ia ki constituencies.
Ha ka dorkhas ba la aiti sha u Myntri Rangbahduh, ka NPP ka la ong ba ki jingkheiñ jingdiah ba la pyndonkam na ka bynta ka Census, ki thup nongthep vote bad ka jingphiah ia ki constituency dei ban long katkum ki jingtip ba la pynshisha shaphang ka jinglong nongshong shnong, da kaba kynthoh ba ka jingtreikam kaba pynshong nongrim ha ki jingkheiñ bym pat pynshisha ka lah ban don ka jingktah ïa ka jingmihkhmat jong ki trai ri trai muluk, ka hok halor ka khyndew ka shyiap bad ka jingïada.
Ka party ka la ong ba ka kyrshan ia ki resolutions ba la mynjur da ka iing dorbar thaw ain jong ka Manipur ha ka 5 tarik Nailar 2022, bad ka 1tarik Lber 2024, kaba pan ia ka NRC, kumjuh ia ki jingdawa ba la wanrah da ki seng bhalang.
Haba pynshai ia ka nongrim jong ka, ka NPP ka la ong ba ia ka NRC dei ban peit kum ka jingpynshisha ia ka jinglong nongshong shnong ym kum kaba la pynbeit pyrshah ia kano kano ka jaitbynriew ne ka niam.Ka la ong ba ia kiba lap ba ki dei ki nongwan buhai shnong beain dei ban leh katkum ka ain bad ka rukom treikam kaba dei.
Ka lama jong ka NPP kala kiew da 300% ha ki shnong lum ba la ithuh.
Kawei na ki jingsngewkhia ba kongsan ba la pynpaw da ka party ka long kaei kaba la batai kum ka jingkiew “bym thikna” ha ka jingdon jong ki shnong ba la ithuh ha ki district lum jong ka Manipur.
Ka NPP ka la kam ba ki shnong ba la ithuh ki la kiew palat 300% ha kine ki san snem ba la dep, katba ki katto katne ki jaka shong jaka sah ki bym pat ithuh ruh ki la mih.
Ka kwah ia ka high-powered committee ban bishar bniah ia ka histori jong kine ki shnong, ki daw ba na sha lyndet kiba pynlong ia ki ban nangroi, ka rukom leit buhai shnong bad ka jingshisha jong ki kot ki sla jong ki jaka shong jaka sah.
Ka party ka la ong ba kum kane ka jingbishar bniah ka long kaba donkam namar ka jingktah kaba lah ban mih na ki jingkhein jingdiah jong ka Census, ki thup nongthep vote bad ka jingphiah ha ki por ban wan.
Ka jingphiah kan tang hadien ba la pynshisha.
Ka NPP ka la dawa ruh ba dei ban pynshisha ia ki thup nongthep vote bad ban pynthymmai tang ynda la dep ia ka NRC.
Ka la kynthoh ba ka jingphiah katkum ki jingkhein jingdiah jong ka jingbun briew ki bym pat lah ban pynshisha ka lah ban pynkylla ia ka jingpynpaw pyrthei ha ka sain pyrthei jong ki jaitbynriew trai ri trai muluk.
Shuh shuh ka party ka la pan ïa ka jingpynshisha ïa ki kot ki sla ba la buh lypa, ki jingïarap bad ki jingpynbha, ki jaka bad ki shnong kiba ïadei bad ki longïing nongphetwir kiba la ïoh jingïarap na ka sorkar bad kiba la shong la sah ha Manipur ha ki snem 1950 haduh 1970.
Ka la khot ban bishar bniah ia ka kyrdan ain jong ki khun ki ksiew jong ki shwa ban shim ia kino kino ki polisi ban rai, da kaba iamir jingmut ha kaba ki jaitbynriew trai ri trai muluk, ki seng bhalang bad ki kynhun tynrai.
Ki 8 tylli ki mat jingdawa ba la buh hakhmat ka sorkar pdeng.
Ha ka dorkhas jong ka, ka NPP ka la jer ia ki 8 tylli ki mat jingdawa ha khmat u Myntri Rangbahduh ba kynhtup ban pyntreikam mardor ia ka NRC ha Manipur shwa ka Census.
Kaba ar kadei ka jingtip jong ka jingkhein briew katkum ki nongshong shnong ba la pynshisha bad kaba lai kadei ka jingithuh bad jingleh pyrshah ia ki nongwan buhai shnong beain katkum ka ain, kynthup ia ka jingshah beh noh ha kaba donkam.
Kaba saw ka high-powered committee ban wad bniah ia ka jingroi jong ki shnong ha ki district lum, kaba san kadei ka jingpynshisha bad pynthymmai ia ki thup kyrteng ki nongthep vote hadien ka NRC.
Kaba hynriew kadei halor ka jingphiah tang hadien ba la dep pyndep ia ka NRC bad ka jingpynshisha ia ka thup nongthep vote, kaba hynniew kadei ka jingithuh bad jingpynshisha ia ki khun ki ksiew jong ki longiing nongphetwir kiba la shong la sah ryngkat bad ka jingiarap jong ka sorkar ha ki snem 1950–70.
Kaba phra kadei ka jingiakren kaba bniah bad ki nongshim bynta shwa ban shim ia ka rai kaba khatduh halor ka jinglong jong ki khun ki ksiew jong ki nongphetwir.
Ka NPP ka la ong ba ka NRC, ka Census, ka thup nongthep vote bad ka jingphiah dei ban khein kum ki kam kiba iadei ym ban leh marwei marwei.
Katkum ka party, ka jingpynlong ia ki jingthoh ba lah ban ngeit shaphang ki nongshong shnong bad ki jingtip ba thikna shaphang ka jingbun briew ka long kaba donkam bha na ka bynta ka jingmihkhmat ha ka synshar paidbah, ka jingsynshar kaba bha bad ka jingiada ia ki jingmyntoi jong ki jaidbynriew trai ri trai muluk.
Ka la kyntu ïa ka sorkar pdeng ban shim ïa ki sienjam “ba kyrkieh”, da kaba ong ba ka rukom treikam kaba shai bad kaba lah ban ngeit kan ïarap ïa ka jingsuk bad jingshong suk shongsaiñ kaba neh slem ha Manipur.
