Pynrem ka FKJGP ia ka jinghiar khynra ki Pulit ia ka Ophis ka KSU | Kyntu ia ka Sorkar ban pynbeit mardor

Shillong, Nailar 20: Ka Federation of Khasi Jaintia and Garo People (FKJGP) ka pynrem jur iaka jingleh ki pulit haka por leit khynra iaka office treikam ka KSU haba kynnoh ba ki Pulit kila pynjulor iaki tiar ki tar bad pyndonkam ia ki bom pynsat khmat bad kiwei kiwei ki tiar pynmynsaw kumba leh ha ki por ba khynra ia ki seng kieng atiar.

“Ka FKJGP-Central Body ka dap da ka jingsngewkhia kaba khraw halor ki kynrum kynram kiba la mih hadien ka jing shim sting jong ka sorkar jylla ia ki mat jingdawa ba buh da ka Khasi Students Union (KSU)” ong u President ka FKJGP Bah Dundee Cliff Khongsit ha ka kyrwoh.

U Bah Dundee ula kynnoh ba katei ka jingleh jong ki pulit ka la pynher syrngiew ia ki paidbah nongshnong shnong, ki khyllung khynnah bad wat ia ki nongpang kiba thiah pang ha Robert Hospital.

Ula kynnoh ba ki Pulit kila pynjulor ruh ia ki ing jong ki riew paidbah kiba don marjan bad ka Office treikam jong ka KSU.

“Kum kitei ki jingleh kidei ki ba ym lah satia ban pdiang da ka seng bad ka imlang ka sahlang hi baroh kawei bad na ka liang jong ka FKJGP ka kyntu ia ki bor Sorkar ba ki dei ban teh lakam ym ban ai laitlan than iaki bor pulit ban pyndonkam bakla ia ka bor khnang ba kin ym mih satia ki jingjia kiba sngewsih” la ong u Bah Dundee.

“Hooid kum ka seng ka tip bad sngewthuh shai ba ki bor jong ka ain ki don la ka jong ka bynta ban leh ban ban pyndep iala ka jong ka kamram hynrei dei pat ban leh da ka lynti kaba dei khnang ba kan ym long pynban sa kaba theh da ka petrol ha ka ding kaba la sdang ban klang ioh kan ktah shuh shuh iaka jing shongsuk shongsain” ula ong.

Naka liang ka FKJGP ka kyntu ia ka Sorkar ba kadei ban shimkhia mardor ia ki kynrum kynram kiba la sdang ban ialam bakla da mano re mano iaki kynhun niah kali Tourist na ka Jylla Assam tang na i daw ibarit ia kaba la pyrshang ban shim kabu da mano re mano ban pynsniewdur ia ka jingiajan hapdeng ka Jylla Meghalaya bad Assam.

“Ka FKJGP kum kawei na ki kynhun kaba don ha ka shatri jong ka North East Indigenous People Forum (NEIPF) kala dep iakren ruh bad ki nongkitkam ba na ka Jylla Assam kumno ban tehlakam bad ban bteng ruh ia kam ki jam kumba ju long baroh shi katta khnang ba kan ym ktah satia ia ki nongleit nongwan na baroh ar tylli ki Jylla” la ong ka kyrwoh.

Shuh shuh ka FKJGP ka kyntu ia ki bor Sorkar ba kam dei satia ban shu khein sting ia ki jinglong jingman bad kyntu ba kadei ban wad ia ki lad ki lynti katba ka por ka dang biang lym kumta ka Sorkar kan ban shim ia ka jingkitkhlieh lada mih kino kino ki kynrum kynram kiba ktah ia ka shongsuk shongsain.