Shillong, Nailar 20: Da kaba pynthikna ia ki nongshong shnong bad ia ki nongjngohkai, u Deputy Commissioner ka East Khasi Hills u Abhilash Baranwal ha ka sngi Palei ula ong ba la wanrah shuh shuh ia ki bor pahara ban tehlakam ba kan ym don kano kano ka jingheh hadien ba ha ka sngi Balang kala mih ka jinghuri hura na ka Rally kaba la pynlong ka KSU bad na ka liang ka Sorkar Meghalaya ka dang iatreilang bad ka Sorkar Assam ban tehlakam ia kane ka jingjia.
“Ngi iengskhem na ka bynta ka jingshngain bad jingiada ia baroh. Ngi lah buh 5 kompani ki CAPF kynthup ia shi kompani ka RAF ryngkat bad ki pulit jong ka district ban pynthikna ba kan ym don shuh shuh kano kano ka jingjia. Kino kino kiba shim ia ka ain ha la ki jong ki kti kin shah leh da kaba tyngeh” ong u Baranwal.
Ula kyntu ia ki nongshong shnong ka Shillong bad East Khasi Hills ban iatreilang bad ki bor pyniaid shnong bad ki pulit, ban pyntip haba don kino kino ki jingjia bad ban kiar ban pynsaphriang ia kino kino ki hamsaia.
Haba pynrem ia ka jingpynmih huri hura, u DC ula ong,”Katto katne tylli ki jingjia jong ka jingthombor kala jia kiba la ktah ia ka jingling jongman jong ka shongsuk shongsain hapoh ka nongbah bad ki long kiei kiei kiba ym lah ban pdiang satia ha kane ka imlang sahlang kaba shongsuk shongsain”.
Ula ong ba ka Rally, la ai jingbit ryngkat bad ki kyndon kiba eh naduh ka por 4 baje, hynrei naduh Jaiaw, la sakhi ia ka jingpynjulor, jingthang, jingshoh ia ki nongiaid lynti bad ka jingpynjulor ia u motsahnam jongu Swami Vivekananda bad Netaji Subhas Chandra Bose.
U Baranwal ula ong, ba kum kine ki jingjia kila pynmong ia ka kam jngohkai ha Meghalaya bad ia ka kamai kajih kaba iadonbynta bad katei bad ka lah ruh ban ktah shabar ka jylla.
“Ki jingjia kum kine kila ktah jur pat ia ka jingpyrshang ban kyntiew ia ka Meghalaya kum ka jaka jngohkai hapoh ka ri bad ha ka pyrthei, kaba don ka jingiadei kaba beit beit ban kyntiew ia ka kamai jakpoh” ula ong.
Ula pynthikna ia ki khubor ba ki kali na Meghalaya kila shah pynsangeh bad shah pynjulor hajan Jorabat.
“Ngi lah iohi ba hajan Jorabat, ki kali na Meghalaya kila shah pynsangeh noh. Ki bor pyniaid district bad ka Sorkar Meghalaya kila shimkhia bha ia kane ka kam bad ka Sorkar Assam” ula ong.
Ula ong ba kane ka jingleh ban pynphai kylla ka lah ban ktah ia ka jingiohkam ki samla bad ka pynpaw ba ka MSSDS kala dep ban ithuh kumba 20,000 tylli ki kam shabar ka jylla.
“Kano kano ka jingpynphai kylla ha kino kino ki bynta jong ka ri, kan ktah jur ia ki samla ki jong ngi ban leit wad ia ki lad ban iohkam iohjam shabar jong ka jylla” ula ong.
Halor ka jingai jingbit khamtam haba mynshwa ruh la sakhi ia ki jingjia, ula ong “Ka Sorkar Meghalaya ka ngeit skhem ha ki jingiakhih katkum ka synshar paidbah. Lada ka don kano kano ka jingaplai ban pynlong ia ka jingiakhih kaba jaijai, ngi kwah ban plie lad ia katei hapoh ki kyndon kiba tyngeh. Ban pan jingbit ban pynlong ia ka jingiakhih, kam dei satia pat ka jingai jingbit ban shoh briew, ban pynjulor ne ban wiangding, ban ktah ne pynsngewsih ia ki khunlung khynnah”.
U DC ula ong ba la buh kumba 200 ngut ki pulit namar katei ka jingaiid Rally kala long kaba jrong bad la don ruh ki jaka ne ki kheip kiba sngewkhia bha.
Ula ong ba ki dang peitbniah bha ia ka jinglong jingma jong ka kam syntiat
“Ka long kaba dang kloi than ban ong ba kadei ka jingpulom jong ka tnad syntiat. Ngi lah ioh ia ki jingtip bad dei halor kane ka daw ba ngi lah ai jingbit ryngkat bad ki kyndon kiba tyngeh bad la buh ruh ia ki pulit.
La kadei kaba la dap bad kaba la buh ha ka por kaba biang, kadei kaei kaei kaba ngi donkam ban khmih bniah bha. Ngi lah dei ban lah ban leh bha shuhshuh” ula ong.
Ula pynshai ba ka jingai jingbit na ka bynta ka jingiakhih kaba jaijai kam de satia pat ka jingai jingbit ban shoh ne ban pynjulor.
