Itanagar, Risaw 10: Ki suba lehnoh ka NSCN-KYA kila shah kynnoh donkti ha kaba siat iap ia uwei u nongkhaii 70 snem rta ha Longding district hapoh Arunachal Pradesh.
Ia une u nongkhaii bala shah siat iap la tip kyrteng kum u Atar Singh, uba don ia ka dukan die marbam ha Longding ha Arunachal Pradesh.Kane ka jingjia kala jia kala jia hynnin ka sngi U Blei ha ka por kumba 6 baje janmiet.
U Atar Singh ula don ryngkat bad la u jong u khun u Arun Kumar Sharma lem bad ka kurim jong u ka Billo Devi hapoh ka dukan hadien ba ki sawngut ki lehnoh ka NSCN-KYA kila wan ban siat iap ia u.
Ia une u nongkhaii uba la shah siat ar kuli na ki bynta jong ka shadem la pynkit noh mar mar shapoh Longding community health centre (CHC) na ka bynta ban aijingsumar.Hynrei ula khald noh tang hadien katto katne por.
U Atar Singh uba dei tynrai na Haryana ula wan shong shnong hapoh Longding district hapoh Arunachal Pradesh naduh kine ki 40 snem kiba la dep.Naduh ba ula wan poi ha Longding, u Atar Singh ula pyniaid ia kane ka dukan die mar bam.
Ha kawei pat ka bynta, na ka liang ki bor pulit ka Arunachal Pradesh kila kem noh ia sawngut ki suba lehnoh jong katei ka kynhun ha kaba iadei bad katei ka jingjia shah pyniap.
La suba jur ia ka jingdonkti jong ki lehnoh ka NSCN-KYA ha kaba iadei bad katei ka jingshah pyniap jong u Atar Singh hapoh Longding district.
Ha kawei pat ka liang, na ka liang ki nongkhaii hapoh Longding district kila khot pynlong da ka pakhang shnong hapoh ka sor rit ha Longding ban dawa kem mardor ia ki runar kiba donkti ha katei ka kam pyniap.
Lah ban kdew ba ka kynhun seng lehnoh NSCN-KYA lem bad kiwei pat ki kynhun kieng atiar ki dei kiba donkti ha ki kam dawa pisa jubor na ki bynta jong ka Tirap, Changlang bad Longding district ka Arunachal Pradesh.
Na ka liang ki nongshong shnong hapoh Tirap, Changlang bad Longding district dang ha kine ki khyndiat bnai ba la dep kila pynlong ia ki jingiakhih ban dawa pynkut noh ia kine ki kam dawa pisa bad ia ki kam lehnoh hapoh ka thain.
